Ońtústik Qazaqstan oblysynyń ár aýylynda ájeler alqasyn qurý josparlanyp otyr. Oblystyq ardagerler keńesiniń Kentaý qalasynda ótkizilgen semınarynda osyndaı uıǵarym jasaldy. Bul týraly El.kz habarlady.
Jalpy, bul óńirdiń aýdandarynda ájeler alqasy bar. Endi barlyq aýyldarda osy uıymdy qurý maqsaty tur. «Bizdiń negizgi mindetimiz – qoǵamdy aýyzbirlikke, yntymaqqa úndeý. Ul men qyzǵa tárbıe berýdi de nazardan qaǵys qaldyrmaımyz. Osy turǵydan kelgende, ájeler alqasyn aýyldarda qurýdy ýaqyt ozdyrmaı qolǵa alýymyz kerek», - deıdi oblystyq ardagerler keńesiniń tóraǵasy Jeńisbek Máýlenqulov.
Bıyl qurylǵan Shardara aýdandyq ájeler alqasy tóraıymynyń orynbasary Jańylaı Zııashqyzy birqatar isterdi júzege asyratyndyqtaryn málim etti. Sonyń ishinde jastarǵa «Qursaqshashar», «Toqymqaǵar» jáne ózge de ulttyq qundylyqtarymyzdy dáripteıdi. Kelin men ene arasyndaǵy syılastyq máselesi de áńgimege arqaý etilmek.
Danııar Túımebaı.