Bul toptamada álemniń 175 elinde taraǵan Covid-19 vırýsyna qatysty sońǵy jańalyqtardy jarııalap otyramyz.
26 naýryzda Johns Hopkins University (JHU) usynǵan málimet boıynsha vırýs juqtyrǵandar sany - 487 648, ólim sany - 22 030, aıyqqandar sany - 117 749 adam boldy (jańartylǵan ýaqyty 18:04).
18:50
Máskeýde qoǵamdyq oryndar jabylady
Máskeýde azyq-túlik satatyn dúkender men dárihanalardan basqa saýda oryndary, meıramhanalar, barlar men saıabaqtar jabylatyn boldy. Sońǵy eki kúnde Reseıde koronavırýs juqtyrǵandar sany kúrt artty. Qazir elde barlyǵy 840 jaǵdaı tirkelgen. 3 naýqas indetten kóz jumsa, 799 adam aıyqqan. Reseı bıligi sheteldegi el azamattaryn qaıtaratyn arnaıy reısterden basqa barlyq halyqaralyq ushýǵa tyıym saldy.
Sýret: Sergeı Savostıanov / TASS
18:02
Italııada indetti jeńgen jasy eń úlken naýqas 95-te
Sheteldik BAQ Italııada koronavırýsty jeńgen 95 jastaǵy áje týraly habardy jarysa jazdy. Bul jańalyq elde 7500-den astam adamnyń qazasyna alyp kelgen indetti jeńýge úmit bergendeı. Keıbir derekkózder ony Italııada indetti jeńgen jasy eń úlken naýqas dep atady.
Alma Klara Korsını aýrýhanaǵa 5 naýryz kúni túsken. Úsh aptadan keıin ol indetten tolyq aıyǵyp, úıine oralǵan. Ol Modena provınsııasynyń Fanano qalasynda turady.
Dárigerlerdiń aıtýynsha, onyń aǵzasy emdi jaqsy qabyldap, Covid-19 vırýsyn jeńip shyqqan.
Gazzetta Di Modena basylymyna bergen suhbatynda «Iá, ıá, mende bári jaqsy» dep jaýap beripti. Naýqas ony emdegen dárigerlerdiń jaqsy adam ekenin atap ótip, olarǵa alǵys bildirgen.
Italııa - álemde koronavırýs ınfeksııasy kóp taraǵan Qytaıdan keıingi ekinshi memleket. Elde barlyǵy 74 386 jaǵdaı tirkelip, 7503 adam kóz jumǵan. Vırýs juqtyrǵandardyń 9362-si indetten jazylǵan.
16:27
Iranda bir táýlikte 157 adam kóz jumdy
Irannyń Densaýlyq saqtaý mınıstrligi sońǵy 24 saǵatta elde vırýstan 157 adam qaza tapqanyn málimdedi. Jalpy Iranda indetten qaza bolǵandar sany 2 234-ke jetti.
Sondaı-aq elde bir kúnde koronavırýs juqtyrýdyń jańa 2 389 deregi tirkelgen, sonymen Iranda jalpy 29 406 adam indet juqtyrǵan.
Johns Hopkins University (JHU) málimetine sáıkes, Iran álemdegi ınfeksııa sany kóp 6-shy el.
Álemdegi sońǵy jańalyqtar qysqasha:
• Qazaqstanda vırýs juqtyrǵandar sany 109-ǵa jetti
• Ulybrıtanııa hanzadasy Charlzdan COVID-19 anyqtaldy
• Álem elderi saqtyq sharalaryn kúsheıtip jatyr
• Máskeýde koronavırýs juqtyrǵan 2 adam kóz jumdy
• Tesla men SpaceX jasandy dem alýǵa kómektesetin apparat shyǵarady
• Karıkatýrshylar arasynda «Biz koronavırýsty jeńemiz» baıqaýy ótip jatyr
• AQSh-ta koronavırýsty tolyqtaı toqtatý úshin aıyna 1 trıllıon dollar ketýi múmkin