Iran Islam Respýblıkasynda birinshi ret áıel adam elshi bolýy múmkin. Bul týraly «Lenta.rý» habarlady.
Iran syrtqy ister mınıstrligi baspasóz hatshysynyń málimetine qaraǵanda, atalmysh vedomstvonyń basshysy Mýhammad Javad Zarıv aldaǵy aptanyń ishinde joǵary laýazymdy dıplomatııalyq qyzmetke áıel zatyn taǵaıyndaýdy josparlap otyrǵan kórinedi. Ázirge onyń kim ekeni, qaı elge elshi bolyp bekitiletini belgisiz. Sondaı-aq, mınıstrliktiń baspasóz hatshysy qyzmetine de áıel adamnyń kandıdatýrasy usynylyp, bul másele talqylanýda.
Jalpy, áıelderdiń saıası sahnaǵa shyǵýy, bıik laýazymǵa ıe bolýy óte sırek kezdesetin memleketterdiń biri – Iran. Sondyqtan, bul elde áıel adamnyń saıası sahnaǵa shyǵýy jańalyq retinde qabyldanady.
1979 jyldyń 11 aqpanynda Islam Respýblıkasy bolyp jarııalanǵaly beri bul eldegi saıası qyzmetke taǵaıyndalǵan áıelderdiń qatary saýsaqpen sanarlyqtaı.
Máselen, Irandy 1997-2005 jyldar aralyǵynda basqarǵan Mýhammad Hatamı kezinde Masýmeh Ebtekar degen áıel vıse-prezıdent boldy. Ol qorshaǵan orta salasyna qatysty máselelermen shuǵyldanǵan. Al prezıdent retinde óz ókilettigin taıaýda toqtatqan Mahmýd Ahmadınedjad tusynda (2005-2013 jj.) bir ǵana áıel mınıstr boldy. Ol – 2009-2012 jyldar aralyǵynda Iran densaýlyq saqtaý salasyn basqarǵan Marsıh Vahıd Dastjerdı. Iranda tuńǵysh ret mınıstr bolǵan áıel retinde Marsıh Vahıd Dastjerdıdiń esimi tarıhqa jazyldy. Ol 2012 jyly elde dári-dármekterdiń baǵasy ósip ketkenine baılanysty Mahmýd Ahmadınedjadpen kelise almaı, qyzmetinen bosatyldy.
Sol sııaqty, 2013 jyldyń tamyzynda Iran prezıdenti retinde ant qabyldaǵan Hasan Rýhanı da áıelderge «oń kózben» qaraǵandaı. О́ıtkeni, jańa prezıdent quqyq salasy boıynsha óziniń vıse-prezıdenti retinde ǵylym doktory Eham Amınzadeni taǵaıyndady. Buǵan qosa, taǵy bir uzyn etekti el prezıdentiniń áıelder isi jónindegi keńesshisi bolypty.
Joldybaı Bazarov.