Túrkistan óńirinde «Nur Otan» partııasynyń bastamasymen qolǵa alynǵan «Biz birgemiz» aksııasy jalǵasyn tabýda. Aksııa aıasynda Saıram aýdany Ásil aýylyndaǵy az qamtylǵan otbasylarǵa áleýmettik paket taratyldy.
Qınalǵan jandarǵa qol ushyn berýdi azamattyq paryzy sanaǵan jeke kásipker Serik Ibadýllaev óziniń týǵan ólkesine demeýshilik jasaǵandy jón sanapty. Sóıtip «Intertehservıs-ITD» JShS bas dırektory turmysy tómen 30 otbasyǵa áleýmettik paket daıyndaǵan. Oǵan qosa 200 medısınalyq maska taratqan. Áleýmettik pakette medısınalyq maskalarmen qatar un, makaron, piste maı, qant, kir sabyn sııaqty kúndelikti qajetti taýarlar bar. Ásil aýylynyń túrǵyny, birinshi toptaǵy múgedek Beıbit Sársenovtiń qaıyrymdy janǵa aıtar alǵysy sheksiz. «Saıram aýdanynda 122 otbasy kómekke asa muqtajdar tizimine engizilgen. Osy ýaqytqa deıin olardyń barlyǵyna áleýmettik paket taratyldy. Budan bylaı taǵy ekinshi kezektegi muqtajdar tizim jasaqtaımyz», deıdi «Nur Otan» partııasy Saıram aýdandyq fılıaly tóraǵasynyń birinshi orynbasary Almas Ábdiqadirov.
El múddesin kózdep, qolyndaǵysyn ózgemen bólisýge daıar turatyn azamattardyń biri – Túrkistan oblystyq máslıhattyń depýtaty, kásipker Qaırat Súleımenov te saýapty istiń ortasynan tabylyp, kómekke muqtaj jandardy azyq- túlikpen qamtamasyz etti. Elbasy Úndeýin qoldap jomarttyq tanytqan Qaırat Súleımenov «Biz birgemiz!» aksııasy aıasynda óz qarajaty esebinen arnaıy qorǵa 1 mıllıon teńge aýdardy. Sondaı-aq Túrkistan oblystyq aqsaqaldar alqasy bastamasymen ashylǵan áleýmettik dúkende jaǵdaıy tómen otbasylarǵa tegin azyq-túlik taratylýda. Sonymen qatar kıim-keshek te berilýde. Aqsaqaldar alqasy Túrkistan qalasyndaǵy 16 sektorǵa bı saılaǵan. Sol azamattar az qamtylǵan otbasylardy iriktep beredi. Kómek alyp kóńilin demdegen jáne eldi biriktiretin aksııany júzege asyrýshylarǵa alǵysy sheksiz jandardyń biri Jámıla Sanjarqyzy dúnıege 11 ul-qyz ákelgen. Shaǵyn kásipkerlikpen aınalysyp kelgen otaǵasynyń jumysy ýaqytsha toqtap tur eken. Batyr ana aqsaqaldar tarapynan berilgen kómekke dán rıza. Áleýmettik dúkende esep aıyrysý degen atymen joq. Aqsaqaldar qajetti azyq-túlikti tegin beredi. Qaıyrymdylyq jasaǵysy kelgender osynda kelip qoldaý kórsetýde. Mysaly, oblystyq máslıhat depýtaty Baımahan Súleımenov aqsaqaldar alqasymen birlese jumys istep, áleýmettik dúkenge 2 tonnaǵa jýyq azyq-túlik ákelgen.
Aıta ketelik, aptanyń sársenbisinde ǵana jumys isteıtin áleýmettik dúkende sol kúni Túrkistandaǵy 16 sektordyń árqaısysynan bir otbasyǵa tegin taýar beriledi.
Túrkistan oblysy