Kompanııa kórsetken kómek
Atyraý oblysyndaǵy iri ınvestordyń biri – «Teńizshevroıl» birlesken kásiporny koronavırýspen kúres sharalaryna 1,3 mlrd teńge bóldi.
Kompanııanyń Úkimetpen jáne qoǵammen baılanys bóliminiń bas menedjeri Rzabek Artyǵalıevtiń aıtýynsha, Teńiz ken ornynda medısınalyq qural-jabdyqtarmen qamtylǵan 300 oryndyq oqshaýlaý orny daıyndalǵan. Qazir kompanııa qyzmetkerleri dene qyzýy ólshengennen keıin ǵana jumys ornyna jiberiledi. Al keńse qyzmetkerleriniń 70%-y qashyqtan jumys isteý rejimine kóshken. Olardyń jalaqysy saqtalady.
– Bizdiń kompanııanyń esebinen bólingen 1,3 mıllıard teńgege medısınalyq qurylǵylar men jabdyqtar satyp alynyp, Atyraý oblysynyń densaýlyq saqtaý mekemelerine beriledi. Qazirdiń ózinde qurylǵylardyń bir bóligi ákelindi. Qalǵany jaqynda jetkiziledi. Sondaı-aq «Teńizshevroıldyń» bastamasymen «Atyraý – Astrahan» tas joly boıyndaǵy oqshaýlaý beketi jabdyqtaldy, – dedi kompanııanyń Úkimetpen jáne qoǵammen baılanys bóliminiń bas menedjeri Rzabek Artyǵalıev.
Qansha ekspress-test bar?
О́ńirlik kommýnıkasııalar qyzmetiniń málimetine súıensek, koronavırýs ınfeksııasynyń bar-joǵyn tekseretin ekspress-test shetelderden kelgenderge, sondaı-aq jergilikti emhanalarǵa JRVI belgisimen júgingen adamdarǵa júrgizilýde.
Koronavırýs belgisi anyqtalǵan adamdarmen jaqyn qarym-qatynasta bolǵan turǵyndarǵa da synama test júrgiziledi. Dárigerler test nátıjesin 6 saǵattan keıin alady.
– Atyraý qalasynda turǵyndardan ekspress-test alatyn 5 vırýsologııa toby jumys isteýde. Jalpy, aımaqta koronavırýsty anyqtaýǵa arnalǵan 700 test bar. Test toptamalary qosymsha qajet bolsa, taǵy da tıisti mólsherde jetkiziletin bolady, – dep habarlady oblystyq densaýlyq saqtaý basqarmasy.
Qorda – 824 tonna un
Atyraý qalalyq kásipkerlik jáne týrızm bóliminiń málimetine qaraǵanda, qazir 8 naýbaıhana úzilissiz jumys istep tur. Munda táýligine 40 myń bólke nan pisiriledi.
«Dáýlet Nan» JShS-nyń nan pisirý sehy óndiris qýatyn ulǵaıtýdy kózdep otyr. Munda osy kezge deıin táýligine 7 myń bólke nan pisirilgen. Endi ony táýligine 15 myńǵa deıin kóbeıtpek.
– Qazir nan sehynda 90 adam jumys isteıdi. Jumysshylar sanyn qysqartpaımyz. Kerisinshe, biz qosymsha adamdardy jumysqa tartyp, jumysshylar qataryn kóbeıtemiz, – deıdi «Dáýlet Nan» JShS ókili Farýh Abdýllaev.
О́ńirlik kommýnıkasııalar qyzmetiniń málimetinshe, Atyraý oblysynda 824 tonna un qory bar. Onyń 520 tonnasy turaqtandyrý qorynda saqtaýly. Jergilikti ákimdik tótenshe jaǵdaı kezindegi turaqtylyqty saqtaý úshin qosymsha 17 myń 115 tonna un satyp alýdy josparlap otyr.
Jolaýshy da, avtobýs ta azaıdy
Atyraý qalasyndaǵy avtobýstarǵa minetin jolaýshylar burynǵydaı kóp emes. Tipti birneshe esege azaıyp ketti.
«Smart Atyraý» KMM dırektory Ádilbek Tańqıevtiń aıtýynsha, buryn kúnine qala ishindegi avtobýs qatynasynda jolaýshylar aǵyny 100 myńdy quraǵan. Al qazir 40 myńǵa deıin azaıǵany baıqalǵan.
– Tótenshe jaǵdaıdyń engizilýine baılanysty Atyraý qalasynda jolaýshy tasymaldaıtyn avtobýstardyń sanyn 160-tan 140 birlikke deıin qysqartýǵa uıǵarym jasadyq. Demalys kúnderi jolaýshylardy 115 avtobýs tasymaldaıdy. Reısten oralǵan boıda ár avtobýstyń salonyna sanıtarlyq tazalyq júrgizilip, dezınfeksııalyq eritindimen óńdeledi. Osy maqsatta kondýktorlarǵa arnaıy qolǵaptar men dezınfeksııalyq quraldar berildi, – dedi Ádilbek Tańqıev.
Avtobýstar toqtap tur
Atyraý qalasyndaǵy avtobeketten aýdanaralyq, qalaaralyq, sondaı-aq halyqaralyq baǵytqa qatynaıtyn avtobýstar toqtady.
Avtobeket dırektory Vadım Sınkeevıchtiń aıtýynsha, osy kezge deıin 6 baǵytqa 14 reıs jolaýshy tasymaldap kelgen. Endi Atyraý – Astrahan, Atyraý – Beıneý, Atyraý – Oral, Atyraý – Maqat, Atyraý – Inder, Atyraý – Qulsary baǵytyna qatynaıtyn avtobýstardyń qozǵalysy toqtatyldy. Sońǵy reıs 28 naýryzda Atyraýdan Maqatqa ǵana júrgen.
– Bizdiń avtobýstarymyzdyń syıymdylyǵy – 50 adam. Tótenshe jaǵdaı engizilgennen beri jolaýshylar sany 2-3 adamnan aspady, – deıdi Vadım Sınkeevıch.
Jumasat ǴAZIZ