Memleket basshysy Qasym-Jomart Kemelulynyń atyna Mońǵolııa jerindegi qandastarymyzdyń alǵysyn arqalaǵan haty kelip tústi. Bul týraly Prezıdenttiń baspasóz hatshysy Berik Ýálı Facebook paraqshasynda jazdy.
Hatta qandastarymyz osynaý qıyn qystaý zamanda Qazaqstanǵa bilim alý úshin kelgen qarakózderge qamqorlyq kórsetip, barlyq jaǵdaı jasap otyrǵan memleketimizge, osyndaı jaǵdaıdyń jasalýyna pármen berip, baqylaýda ustap otyrǵan Prezıdentke rızashylyqtaryn bildirgen.
«Sizge qıyrdaǵy Mońǵolııa memleketinde meken etken qazaq qandastaryńyzdyń atynan duǵaı sálem! Qyzmetińizge sáttilik pen tabys tileımiz. Qazaqstannyń abyroıy arta bersin! Álemdi jaılaǵan myna indet tezirek ketip, aqjarylqap ýaqyt bastalsyn dep, Jaratqannan suraımyz», - dep bastalypty qandastarymyzdyń haty. Budan ary Mońǵolııadaǵy indetpen kúres sharalaryn aıta kelip: «Osy shekaralar jabylyp, ushaq ushpaı, kólik júrmeı qalǵan qıyn kezde bizdiń biraz oqýshy balamyz Qazaqstan Respýblıkasynda qalyp qoıdy. Biz buǵan áý basta qatty alańdadyq. Tipti, ýaıymdap, ábirjigen kezimiz de boldy. Alaıda, bunymyz beker bolyp shyqty. Eń birinshiden, Prezıdent retinde О́zińizdiń qamqorlyǵyńyzdyń arqasynda, ekinshiden, Bilim jáne ǵylym mınıstrligi men L.N.Gýmılev atyndaǵy Eýrazııa ulttyq ýnıversıtetiniń kómegimen Qazaqstanǵa bilim izdep barǵan daıarlyq bólimindegi ul-qyzdarymyzdyń tamaǵy toq, kóılegi kók. Olar da el azamattarymen birdeı karantın talaptaryn saqtap, aqparattyq tehnologııa júıesimen sabaqtaryn oqyp júr. Muny telefon arqyly kúnde bilip otyrmyz. Kóńilimiz ornyna tústi. «Shúkir!» dep otyrmyz. Ardaqty Qasym-Jomart Kemeluly! Bizdiń oqýdaǵy balalarymyz erteń stýdent, sodan keıin maman atanyp, Qazaqstan-Monǵolııa yntymaqtastyǵyn odan ári arttyrady dep senemiz. Rızashylyq nıetpen, L.N.Gýmılev atyndaǵy Eýrazııa ulttyq ýnıversıtetiniń daıarlyq bóliminde oqyp jatqan Mońǵol Ulysy oqýshylarynyń ata-analary», - dep, hattyń astyna 13 ata-ana qol qoıypty.