«Qazaqtelekom» AQ Basqarma tóraǵasy Qýanyshbek Esekeev Ortalyq kommýnıkasııalar qyzmeti alańynda ótken onlaın brıfıngte tótenshe jaǵdaı kezindegi ınternet jumysy jaıynda baıandady.
«Sońǵy birneshe apta ishinde, elimizde tótenshe jaǵdaı jarııalanyp, karantın engizilgeli beri, «Qazaqtelekom» AQ kompanııalar tobyndaǵy syrtqy ınternet arnalardaǵy trafık 20% -dan astam ósti, al Google, Youtube, áleýmettik jeliler jáne messendjerler, ıaǵnı bir sózben aıtqanda top kontenttiń jergilikti keshteý serverlerindegi trafık birden 15% -ǵa artty. Trafıktiń kúrt artýynyń negizgi sebepteri, meniń oıymsha, barshaǵa túsinikti, degenmen, qysqasha toqtalyp óteıin – negizgi sebep qazaqstandyqtardyń basym bóliginiń jumysy onlaın formatqa kóshýi, beıne-kontentti tutynýdyń edáýir artýy, klıentterimizdiń jelide otyratyn ýaqytynyń aıtarlyqtaı ósýi, sonymen qatar kóptegen jańa klıentterdiń qosylýy», dedi «Qazaqtelekom» AQ Basqarma tóraǵasy Qýanyshbek Esekeev.
Onyń aıtýynsha, tek naýryz aıynyń ózinde «Qazaqtelekomnyń» abonenttik bazasy 25000 klıentpen tolyqqan.
«Biz syrtqy arnalardyń syıymdylyǵyn 360 Gbıtke keńeıtkenimizdi jáne jelidegi júktemeniń edáýir artýyna qaramastan, ony jalǵastyra beretinimizdi atap ótkim keledi. Tótenshe jaǵdaı jarııalanǵannan beri «Qazaqtelekom» syrtqy ınternet arnalarynyń ótkizý qabilettiligin arttyrý boıynsha provaıderlermen jedel kelissózder júrgizdi. Qazirgi ýaqytta bul arnalar shamamen 25% keńeıtildi, bul syrtqy ınternet arnalaryn júktemeýge jáne usynylatyn qyzmet sapasyn jaqsartýǵa múmkindik beredi.