Sońǵy habarǵa qaraǵanda Soltústik Qazaqstanda 168 adam tótenshe jaǵdaı rejimin buzǵany úshin ákimshilik jaýapqa tartyldy. Onyń 93-ine aıyppul salyndy, 13-i qamaýǵa alyndy, al qalǵan materıaldar sotta qaralýda.
Qabyldanyp jatqan sharalar men túsindirý jumystaryna qaramastan, buzýshylyqtyń kóbeıýi jalǵasýda. Kóbine, dúkender, dárihanalar men basqa da uıymdar jabylǵanǵannan keıin, keshki ýaqytta júrgen quqyq buzýshylar da kezdesedi.
Petropavl qalasynyń kóshelerindegi avtokólik qozǵalysy keshki mezgilde azaıǵanymen qozǵalys jalǵasýda. Kóbinese, bul ýaqytta taksı, jetkizý qyzmetiniń júrgizýshileri, jumysta kidirgender júredi. Patrýldik polısııa qyzmetkerleri kólikterdi toqtatyp, júrgizýshilerdiń qujattaryn tekseredi.
Keshe keshki saǵat 10-da toqtatylǵan kóliktiń júrgizýshisinde qujattary durys bolǵanymen, jolaýshylarynyń eshqaısysynda jeke basyn kýálandyratyn qujat, qala boıynsha júrip-turýǵa ruqsat beretin qandaı da bir anyqtama joq bolyp shyqty. Túngi ýaqytta eki jas jigittiń qonaqtan kele jatqany belgili boldy. Jumystan keıin qonaqqa barǵandaryn aıtady. Biraq jumys oryndarynan berilgen anyqtama bolmaǵan. Olarǵa qatysty Tótenshe jaǵdaı rejimin buzǵan degen aıyppen ákimshilik materıaldar jınaldy.
«Karantın kezinde kórshilerge, tanystarǵa, týystarǵa jáne áriptesterge barýǵa tyıym salynady. Faktilerden kórinip otyrǵandaı, keıbir azamattar keshki ýaqytta taksı qyzmetin paıdalanyp, bul talapty elemeıdi», - deıdi qalalyq jergilikti polısııa qyzmeti bólimi bastyǵynyń orynbasary polısııa podpolkovnıgi Aıdyn Aqmaǵambetov.
PETROPAVL