«Bekire – 2020» aksııasynyń basynan beri tabıǵatty qorǵaý organdary men shekara qyzmetiniń mamandary 250 tabıǵatty qorǵaý zańnamasyn buzýshylyqty anyqtap, ákimshilik jaýapkershilikke 100 zań buzýshy tartylyp, 4 qylmystyq is qozǵaldy, dep habarlady Ekologııa, geologııa jáne tabıǵı resýrstar mınıstrliginiń baspasóz qyzmeti.
Nátıjesinde 1,5 mln teńge somada ákimshilik aıyppul salynyp, 3,7 tonna balyq tárkilendi, onyń ishinde 333 kg bekire tuqymdas balyq túri, 15,4 kg bekire tuqymdas balyqtyń ýyldyryǵy jáne 600 zańsyz aýlaý qurylǵysy tárkilendi.
Qazirgi ýaqytta aksııany ótkizýge 800 qyzmetker, 60 júzý kóligi, 116 avtokólik, 2 tikushaq jumyldyryldy. Atyraý, Mańǵystaý jáne Batys Qazaqstan oblystarynda 44 jyljymaly jáne stasıonarly posttar quryldy.
Sonymen qatar 2020 jylǵy 14 sáýirde «Bekire -2020» aksııasy aıasyndaǵy reıdtik shara júrgizý barysynda Atyraý oblystyq orman sharýashylyǵy jáne janýarlar dúnıesi aýmaqtyq ınspeksııasynyń Damby bólimshesiniń ınspektorlary Atyraý qalasyndaǵy Jaıyq ózeniniń boıyndaǵy Erkinqala kentiniń aýmaǵynda (erekshe qorǵalatyn tabıǵı aýmaq) zańsyz balyq aýlap júrgen 4 zań buzýshyny anyqtady.
Balyq qorǵaý qyzmetkerleri zań buzýshylarǵa ózderin tanystyryp, is júrgizý qujattaryn rásimdeýge kirisken kezde buzýshylar qarsylyq kórsetip, ózderiniń Ýral markaly motosıklderin órttep, belgisiz baǵytta boı tasalady. Bul faktini Damby bólimshesiniń qyzmetkerleri uıaly telefonǵa beınege túsirdi.
Oqıǵa ornynan kelesi aıǵaq zattar tárkilendi: jalpy salmaǵy 270 kg bolatyn qara balyq túrleri, 4 dana zańsyz balyq aýlaý quraly - monotalshyqty «qytaı aýy», qoldan jasalǵan júzý quraly jáne Ýral markaly motosıkl. Balyq resýrstaryna keltirilgen shyǵynnyń somasy 900 072 teńgeni quraıdy.
Atalǵan fakti boıynsha QR Qylmystyq Kodeksiniń 335-babymen qylmystyq is qozǵalyp, quqyq qorǵaý organdaryna janýarlar dúnıesin qorǵaý jónindegi úsh memlekettik ınspektorlardyń ómirine qaýip tóndirý faktisi boıynsha resmı ótinish joldandy.