Úshinshi megapolıstegi oqý oryndarynyń biriniń stýdenti, kámelet jasyna tolmaǵan qyzdy jeńgetaılyq jasap júrgen jeksuryn jynystyq qyzmet kórsetý úshin birneshe ret usynǵany anyqtalyp otyr.
Jeńgetaılyq kelissózder telefon arqyly júrgizilip, klıentterge qyzdyń sýreti messendjermen kórsetilgen. Tergeý barysynda, sondaı-aq kúdiktiniń aram nıettegilerden iri kólemde aqsha suraý úshin qyzdyń pák, taza ekenin aıtyp, kelisýden keıin kezdesýdi uıymdastyryp otyrǵany belgili boldy.
Kúdiktini quryqtaýǵa oblystyq Polısııa departamentiniń krımınaldyq polısııa basqarmasyna bir áıel kámeletke tolmaǵan qyzdy jynystyq qyzmet kórsetý úshin belgili somaǵa satatyny týraly kelip túsken habarlamanyń septigi tıgen. Sol kúni jedel-izdestirý is-sharasy barysynda, Túrkistan oblysy PD KPB jáne Saıram aýdany polısııa bóliminiń qyzmetkerleri Aqsýkent aýylyndaǵy qonaqúılerdiń birinde kámeletke tolmaǵan qyzdy satý kezinde Shymkent qalasynyń turǵynyn ustady. Atalǵan jaıt QR Qylmystyq kodeksiniń 309-babynyń 2-bóligi (jezókshelikpen aınalysýǵa arnalǵan prıtondar uıymdastyrý nemese ustaý jáne jeńgetaılyq) boıynsha sotqa deıingi tergep-tekserýdiń biryńǵaı tizilimine tirkelgen.
Polısııa qyzmetkerleri kúdiktiden aıǵaqty zat retinde mıllıon teńgeni tárkiledi. Qazirgi ýaqytta atalǵan jaıt boıynsha sotqa deıingi tergeý amaldary júrgizilýde. Kúdikti qamaýǵa alyndy. Túrkistan oblysy PD-niń polıseıleri istiń tolyq mán-jaıyn jáne kúdiktiniń basqa da osyǵan uqsas qylmystarǵa qatystylyǵyn anyqtaýda.