Batys Qazaqstan oblysynda 185 áıel júktilik jáne bosanýyna baılanysty tólenetin memlekettik járdemaqyny onlaın rásimdegen. Tótenshe jaǵdaıǵa baılanysty Halyqqa qyzmet kórsetý ortalyqtary jumysyn ýaqytsha toqtatqaly beri elimizde osyndaı 30 myń járdemaqy onlaın júzege asypty.
«Azamattarǵa arnalǵan úkimet» memlekettik korporasııasy buryn tek halyqqa qyzmet kórsetý ortalyqtary arqyly kórsetip kelgen qyzmetterdi, onyń ishinde júktilikke baılanysty járdemaqy boıynsha ótinishterdi portaldaǵy «Elektrondy ótinishter» servısi arqyly qabyldaý múmkindigin jasaǵan.
«Dekret demalysyna shyqqan júkti áıelder egov.kz portalynda avtorızasııadan ótip, «Elektrondy ótinishter»servısin tańdap,jeke qujaty men jumys isteý qabiletinen aıyrylý paraǵynyń skan kóshirmesin jáne tólem aýdarylýy tıis bank shotyn qosa joldaýy tıis. Endi ǵana balaly bolǵan otbasylar úshin egov.kz portalynyń «Otbasy» – «Bala» bóliminde balanyń týylýyna jáne onyń kútiminebaılanysty járdemaqylardy rásimdeý múmkindigi bar» deıdi «Azamattarǵa arnalǵan úkimet» korporasııasy Batys Qazaqstan oblystyq fılıalynyń PR-menedjeri Maǵzýra Nurmuhanbetova.
Aıta keteıik, portaldy paıdalaný úshin elektrondy sıfrly qoltańba bolýy shart. Ony da portalda qashyqtan rásimdeýge bolady.
Sondaı-aq Mobıldi azamattar bazasynda tirkeýi bar jas analar proaktıv qyzmetin paıdalana alady. Ol arqyly balanyń týýyn tirkep, tıisti járdemaqyny rásimdep, sábıdi balabaqsha kezegine qoıýǵa bolady.