Túrkistan oblysynda COVID-19 ınfeksııasyn juqtyrǵandar sany 50-den asty. Osy oraıda oblys ákiminiń orynbasary Sáken Qalqamanov Ahýal ortalyǵynda málimdeme jasap, azamattardyń ómiri men densaýlyǵyn qorǵaý, halyq arasynda koronavırýstyq ınfeksııanyń keńinen taralýynyń aldyn alý maqsatynda, 2020 jylǵy 18-shi sáýir kúni túngi saǵat 24.00-den bastap, oblys aýmaǵynda karantın rejimi engiziletinin jarııa etti.
Iаǵnı atalmysh ýaqyttan bastap kórshi aımaqtarmen shegaradaǵy sanıtarlyq blok-beketter jumysy kúsheıtiledi. Turǵyndarǵa qalaaralyq, aýdanaralyq jáne eldi mekender arasynda qatynaýǵa shekteý qoıylyp, eldi meken ishindegi qoǵamdyq kólikter men jeke tasymal qyzmetiniń jumysy toqtatylady. Sanıtarlyq-epıdemıologııalyq jaǵdaıdyń turaqtylyǵy úshin qoǵamdyq oryndar men demalys oryndary, saıabaqtar jabylady. Azyq-túlik jáne kıim - keshek bazarlary, turmystyq zattar satatyn bazarlar jumysy toqtatylady. Sondaı-aq áli kúnge alańsyz esik aldynda oınap júrgen balalardyń oıyn alańdarynda, kóp qabatty úılerdiń aýlalarynda oınaýǵa tyıym salynady.
«Turǵylyqty jerde otbasylyq merekeler, týǵan kún, toı-jıyn ótkizýge shekteý qoıylady. Úsh adamnan artyq toptyń kóshede jáne qoǵamdyq oryndarda jınalýyna tyıym salynady. Jasy 65 jastan asqan azamattar úıden shyqpaı, oqshaýlanýy tıis. Turǵyndarǵa tek qajetti azyq-túlik, dári-dármek alýǵa úıge jaqyn jerdegi dúkender men dárihanalarǵa barýyna ruqsat. Azyq-túlik dúkenderiniń jumysy saǵat tańǵy 9 ben keshki 8 aralyǵynda shekteledi», dedi oblys ákiminiń orynbasary.
Turǵyndardyń tirshiligin qamtamasyz etý úshin qajetti azyq-túlik, zattar men ónerkásip, qurylys nysandaryna, kóktemgi egis jumystaryna qajet óndiristik taýarlar, materıaldar, medısınalyq zattar tasýǵa ruqsat qaǵazy bar avtokólikter men azamattar jáne medısınalyq kómek qajet bolǵan azamattar ǵana oblys aýmaǵyna kirip-shyǵa alady.
Atap óterligi, qurylys salasy, kóktemgi egis naýqany, jumyspen qamtý jol kartasy, tirshilikti qamtamasyz etý nysandary karantındik rejimge qaramaı jumysyn toqtatpaıdy.