Almaty qalasy ákiminiń orynbasary Erjan Babaqumarov beıne-konferensııa rejıminde Ortalyq qalalyq klınıkalyq aýrýhana ujymymen kezdesý ótkizdi.
Jıynǵa Qoǵamdyq densaýlyq saqtaý basqarmasy men Taýarlar men qyzmetterdiń sapasy men qaýipsizdigin baqylaý departamentiniń basshylyǵy qatysty. Kezdesýde Ortalyq qalalyq klınıkalyq aýrýhanaǵa ýaqytsha ornalastyrylǵan dárigerler men medısınalyq qyzmetkerlerdiń máselelerin sheshý joldary qarastyryldy.
Búginde aýrýhana aýmaǵyndaǵy koronavırýstyq ınfeksııanyń oshaǵy aýyzdyqtalyp, birinshi jáne ekinshi deńgeıde baılanys ornatqandar anyqtalǵan. Ortalyq qalalyq klınıkalyq aýrýhananyń basshysy mindetin atqarýshy Marat Abdýllaev ótken táýlikte aýrýhana aýmaǵyndaǵy 316 tulǵadan taldaýlar (analız) ekinshi qaıtara alynǵanyn málimdedi. Búgin taǵy 249 adam qaıta testileýden ótedi. Sonymen birge, aýrýhananyń bas dárigeri osyǵan deıin aıtylǵan usynystardyń eskerilgenin tilge tıek etti. Eń aldymen emhanada antıseptıkalyq jáne dezınfeksııalyq quraldar artyp, tamaqpen qamtamasyz etý máselesi de sheshimin tapqan. Kezdesýde oftalmologııa bóliminiń meńgerýshisi B.Joldasov, travmotologııa bóliminiń meńgerýshisi B.Erǵalıev, fızıoterapııalyq bólim meńgerýshisi A.Tórequlova, sonymen birge, QazMÚBBÝ travmotologııa jáne ortopedııa kafedrasynyń dosenti K.Orazalıev pen «AGjPǴO» AQ táýelsiz dırektory, azamattyq belsendi A.Áljanova qatysty.
Qala ákiminiń orynbasary Erjan Babaqumarov COVID-19-ǵa test der kezinde alynyp, onyń nátıjesi ár adamǵa ýaqytyly berilý kerektiginiń mańyzdylyǵyn atap ótti. Nátıjesi teris shyqqan dárigerler men medısına qyzmetkerleri arnaıy daıyndalǵan qonaq úı keshenderine ınkýbasııalyq kezeń aıaqtalǵanǵa deıin karantınge jatqyzylady.
«Aýrýhana qyzmetkerlerin qaıta tekserý jáne saraptama nátıjelerin qoldaryna berýge basymdyq berip otyrmyz», – dep atap ótti Erjan Babaqumarov. Qoǵamdyq densaýlyq saqtaý basqarmasy men Taýarlar men qyzmetterdiń sapasy men qaýipsizdigin baqylaý departamentine birlese otyryp, az ýaqyttyń ishinde bul jumysty aıaqtaýdy tapsyrdy.
Sondaı-aq, qala ákiminiń orynbasary Erjan Babaqumarov medısınalyq joǵary oqý oryndary basshylarynyń qatysýymen ótken kezdesýde medısınalyq uıymdarǵa bekitilgen dáriger-rezıdentterdiń eńbek qaýipsizdigin qamtamasyz etý máselelerin kóterdi. Búginde olardyń arasynda koronavırýs ınfeksııasyn juqtyrý jaǵdaılary tirkelgen. Atalǵan naýqastar qazir ınfeksııalyq stasıonarlarda em alýda. Bul rette naýqastarǵa qoldaý kórsetý, sonyń ishinde psıhologııalyq kómek berý joǵary oqý oryndarynyń rektorlaryna tabystaldy. Qoǵamdyq densaýlyq saqtaý basqarmasyna sapaly medısınalyq qyzmet kórsetýdi qamtamasyz etý boıynsha jan-jaqty sharalar qabyldaý qajettigi tapsyryldy. Búginde atalǵan juqtyrý faktileri boıynsha Taýarlar men qyzmetterdiń sapasy men qaýipsizdigin baqylaý departamentimen epıdemıologııalyq tekserýler júrgizilýde.