О́ńirlik kommýnıkasııalar qyzmetinde ótken brıfıngte Aqmola oblystyq tótenshe jaǵdaılar departamentiniń bastyǵy, azamattyq qorǵaý podpolkovnıgi Alekseı Sovetov óńirdegi kólder men ózenderde sý deńgeıiniń qalypty mólsherde ekendigi, sondaı-aq, orman men dala órtiniń aldyn alý jumystary jóninde baıandap berdi.
Jyl saıyn sý tasqyny qaýpin týdyratyn Sileti, Shaǵalaly, Qylshaqty, Esil, Qalqutan men Jabaı ózenderinde búgingi jaǵdaı turaqty. Bıylǵy jyldyń 12 naýryzynda sý tasqynyna qarsy oblystyq shtab qurylyp, daıyndyq jumysy júrgizilgen. Bul jumysqa 2410 adam, 1058 tehnıka, 60 qaıyq, 254 motopompa tartylypty. Basty nazar Astrahan, Atbasar, Arshaly, Selınograd aýdandaryna aýdarylǵan eken. Muz jarý jumysy Qopa kóli men Esil, Nura, Qalqutan, Jabaı, Boqsyq, Talqara, Sarqyrama ózenderinde júrgizilipti. Sý tasqynynan zardap shekkenderdi qabyldaý úshin 222 nysan jáne 70 rezervtik beket daıyndalypty.
– Bıylǵy jyldyń 17 naýryzyna qaraǵan túni Kókshetaý qalasy ishinen aǵyp ótetin Qylshaqty ózenindegi sý deńgeıiniń kúrt kóterilýine baılanysty avtokólik kópiri mańyndaǵy 183 turǵyn úı men № 8 jáne №12 orta mektepterdi, sondaı-aq, 6 sáýirde Esil aýdany aýmaǵynda aǵatyn Janyspaı ózenindegi sý deńgeıiniń kúrt joǵarylaýynan Moskovskıı aýylyndaǵy turǵyn úıler men mal qoralaryn sý basyp qala jazdady. Sandyqtaý aýdanynyń Jabaı ózenindegi sý deńgeıi arnasynan asyp, Balkashıno selosyndaǵy 2 úıdiń aýlasyn sý aldy. Osy ózendegi sýdyń kóterilýinen Atbasar qalasynyń turǵyn úılerin sý basý qaýpi týyndady. Mundaı jaǵdaı aǵymdaǵy jyldyń 14 sáýirinde Astrahan aýdanynda da oryn aldy. Tek jergilikti atqarýshy organdar men tótenshe jaǵdaı salasy qyzmetkerleriniń jedel is-qımylynyń arqasynda ǵana oblys aýmaǵyndaǵy turǵyn úıler sý basýdan aman qaldy,–degen Alekseı Sovetov órt qaýpi týyndaıtyn kóktemgi jáne jazǵy kezeńde orman, dala órtteriniń aldyn alý sharalary jóninde de aıtyp berdi. О́ńir ormandarynda ázirge bir orman órti men daladaǵy qýraǵan shóptiń janýynyń 6 oqıǵasy tirkelgen.
– Dala órtin sóndirý ákimdikterdiń moınyna júkteldi. 6 sáýirde órt qaýpi bar maýsym bastaldy. Sáýir aıynyń ekinshi onkúndiginde tótenshe jaǵdaı jónindegi oblystyq komıssııanyń otyrysyn ótkizý josparlanǵan. 24 aqpanda oblys ákiminiń bastamasymen orman men dala órtin eskertý jáne sóndirý jóninde oblystyq jumys toby qurylǵan bolatyn. Ras, elimizdegi karantınge baılanysty oqý-jattyǵý ótkizilmedi. Degenmen, órt oqıǵasy týyndaı qalǵan kezde tótenshe jaǵdaı departamenti qurylymdary men áskerı bólim, turǵyndarmen birlese qımyldaý nusqaýy bekitildi. 25 orman órti stansııasy, 42 órt qadaǵalaý munarasy, 1382 radıostansııa, 59 órt sóndiretin avtokólik, 130 arnaıy traktor, 793 sý shashqysh, 71 órt motopompasy tárizdi ózge de qajetti quraldar daıyndaldy. Oblysta órtke qarsy 1141 múshesi bar 208 erikti qurylym jumys isteıdi. Olar 53 órt tehnıkasymen jáne 70 motopompamen jabdyqtalǵan. Búgingi kúni 28 beket quryldy. Orman sharýashylyqtaryndaǵy órt qadaǵalaý munaralary men beketterinde táýlik boıy kezekshilik uıymdastyrylǵan. Orman alqaptary sondaı-aq, Aqmola, Býrabaı jáne Kókshetaý avıatoptarynyń kúshimen baqylanady,–dedi Alekseı Sovetov óz sózinde.