Qazaqstan Prezıdentiniń janyndaǵy tótenshe jaǵdaıdy qamtamasyz etý jónindegi memlekettik komıssııanyń sheshimine sáıkes «Azamattarǵa arnalǵan úkimet» memlekettik korporasııasy» KEAQ Almaty qalasynda shaǵyn jáne orta bıznes sýbektilerine qyzmet kórsetý ortalyǵyn ashty.
Búginnen bastap iske qosylǵan ortalyq «Shuǵyla» shaǵyn aýdany, 347/1 meken-jaıynda ornalasqan Naýryzbaı aýdandyq front-ofısiniń ǵımaratynda ornalasqan.
Zańdy tulǵalarǵa qyzmet kórsetetin HQO dúısenbi men juma aralyǵynda 09.00-den 16.00-ge deıin jumys isteıdi. Memlekettik qyzmetterdi sapaly jáne ýaqtyly kórsetý maqsatynda, nesıe berýde oń sheshim alǵan uıymdardyń tizimi boıynsha kestemen qyzmet kórsetiledi.
Sonymen qatar karantın kezinde sanıtarlyq-epıdemıologııalyq rejımdi saqtaý úshin bólim barlyq sanıtarlyq sharalarmen qamtamasyz etilgen. Sondaı-aq, front-ofıste qyzmet kórsetetin mamandardyń qaýipsizdigi maqsatynda olar jeke qorǵaný quraldarymen (betperdeler, antıseptıkter, qolǵaptar) qamtamasyz etilip, qaladaǵy shekteý jaǵdaıynda júrip-turýlary uıymdastyrylǵan.
Qyzmet alýshylardyń da qyzmet alý kezindegi sanıtarlyq qaýipsizdik sharalary qarastyrylǵan. Qyzmet alýshylar kezek kútýi úshin araqashyqtyǵy saqtalǵan arnaıy syzyqtar syzylǵan. Mindetti túrde betperde rejımi saqtalady. Ǵımarat ishine engende antıseptıkti paıdalanyp, ary qaraı qyzmet alýǵa operatorǵa júginedi.
Ortalyqta kórsetiletin negizgi qyzmet túrleri – aýylsharýashylyq jáne agrobıznes salasy ókilderine arnalǵan jyljymaıtyn/jyljymaly múlik kepil shartyn memlekettik tirkeý, jyljymaıtyn/jyljymaly múlik kepil shartyna qosymsha kelisimdi memlekettik tirkeý qyzmetteri.
«Shaǵyn jáne orta bıznes ókilderiniń ǵımarat ishinde jınalýyn boldyrmaý úshin kórsetiletin qyzmetti alýshylardyń nazaryna qujattardyń tolyq paketin usyný qajettiligi týraly eskerte ketsek. Atap aıtqanda:
Jyljymaıtyn/jyljymaly múlik kepil shartyn jáne kepil shartyna qosymsha kelisimdi memlekettik tirkeý úshin: 2 dana kepil sharty /2 dana kepil shartyna qosymsha kelisim/, obektige baılanysty tarıf boıynsha tólem, eger múlik nekede satyp alynǵan bolsa, erli-zaıyptynyń notarıaldy kýálandyrylǵan kelisimi qajet bolady», - deıdi «Azamattarǵa arnalǵan úkimet" memlekettik korporasııasy» KEAQ Almaty qalasy fılıalynyń dırektory Danııar Qyryqbaev.
Alǵashqy jumys kúni 4 kásipker tolyqqandy qyzmet alyp, qalǵan kelýshilerdiń kópshiligi keńes alýmen shekteldi.
Bıznes ókilderine arnalǵan HKO jumysymen tanysqan arnaıy monıtorıngtik toptyń múshesi, qoǵam belsendisi Rafael Gasanov bylaı deıdi:
«Karantın kezinde ekonomıkamyzǵa kóp zııan kelmes úshin, jáne kóktem egisi bastalý kezinde kásipkerlerimiz ýaqytyn jiberip almas úshin bızneske arnalǵan HQO-nyń jumys isteýi úshin atsalysqan edik. Búginnen bastap Almaty qalasynda shaǵyn jáne orta bıznes ókilderine arnalyp HQO jumys isteýde. Búgin onyń jumysymen tanysyp kórdik. Talapqa saı, karantın talaptary da qarastyrylǵan».