Ortalyq kommýnıkasııalar qyzmetiniń alańynda tótenshe jaǵdaı kezinde Memlekettik áleýmettik saqtandyrý qorynan áleýmettik tólem taǵaıyndaý sharttary týraly jalǵan aqparat bergeni úshin jumys berýshiler men azamattardyń jaýapkershiligi týraly onlaın-baspasóz máslıhaty ótti.
Jıyn barysynda Eńbek jáne halyqty áleýmettik qorǵaý mınıstri Birjan Nurymbetov birde-bir adam 42 500 teńge alǵany, tipti jibergen qateligi úshin qylmystyq jazaǵa tartylmaıtynyn atap ótti.
«Búgingi tańda tótenshe jaǵdaıdyń saldaryna baılanysty tabysynan aıyrylǵan 3 mln 960 myń adamǵa áleýmettik tólem taǵaıyndaldy. Olarǵa 157 mlrd teńge tólendi. О́kinishke qaraı, sońǵy 4-5 kún boıy áleýmettik jelilerde, qoǵamda «42 500 teńge alǵany úshin qylmystyq turǵyda jazalaıdy eken» degen áńgime kóp taralyp jatyr. Biz bárin qarap shyqtyq. 5 sáýirden bastap zańgerlerimiz osy máselege qatysty pikirlerin aıta bastady. Onyń ishinde erekshe taralǵany sol kúni zakon.kz portalynda orys tilinde Danııar Nurlanuly men Rýslan Qojahmet esimdi zańger-advokattardyń Qylmystyq kodekstiń alaıaqtyqqa qatysty baptaryn taldap, sony 42 500 teńge tólemine qatystyryp jazǵan maqalasy boldy. Ol azamattar «mınıstr Nurymbetovtiń eshkimdi jappaı teksermeımiz» degen sózin jumys berýshiler paıdalanyp, jalǵan málimetter berýi múmkin» degenge keltirgen. Osyǵan baılanysty, birde-bir adam 42 500 teńge alǵany úshin, tipti jibergen qateligi úshin qylmystyq jazaǵa tartylmaıdy. Oǵan negiz joq. Osyǵan núkte qoıaıyq. Eshkim jaýapkershilikke tartylmaıdy. Ony talqylap jatqan zańgerler de biledi. Biz eshkimdi teksermeımiz. Sebebi bul – áleýmettik tólem. Bul – áleýmetke baǵyttalǵan tólem. Jeke tulǵalardy, resmı ne beıresmı bolsyn, jumys istep júrgenderdi úılerdi aralap, teksermeımiz. Eshteńege ýaıymdamańyzdar. Sizderge tólendi me? Alyńyzdar, jaratyńyzdar. Tekserý bolsa da bizdi tekseredi», dedi mınıstr.
Sonymen qatar ol jumys berýshisi jalaqysynyń 50 paıyzyn ǵana tólep otyrǵan qyzmetkerler 42 500 teńgege ótinim bere almaıtynyn jetkizdi.
«Bul 42 500 teńge áleýmettik tólem jalaqysynan aıyrylǵandarǵa ǵana beriledi. Sondyqtan jalaqy mólsheri tómendegen jaǵdaıda áleýmettik tólem berilmeıdi. Iаǵnı, birde-bir tıyn tólenbeıtin aqysyz demalysqa jiberilgen jaǵdaıda ǵana 42 500 teńge alýǵa quqyǵyńyz bolady jáne ótinish bere alasyzdar», dep jaýap berdi mınıstr.
Sonymen qatar ol áleýmettik tólemdi zańsyz alǵandar qarajatty qashan qaıtarýy kerektigin de atap ótti.
«Qaı ýaqytta qaıtarǵyńyz kelse, sol ýaqytta qaıtara alasyzdar. Onyń merzimi de, qaıtarý tártibi de joq. Eger siz qateleskenińizdi kórip turyp qaıtaramyn deseńiz, ony jaǵdaıyńyz kelgen kezde qaıtaryńyz. Qaıtarmaımyn deseńiz qaıtarmaısyz», dedi B.Nurymbetov.