Prezıdent janyndaǵy Ortalyq kommýnıkasııalar qyzmetiniń alańynda eldegi epıdemııalyq jaǵdaı aıasynda dári-dármekpen qamtamasyz etý máselesi boıynsha onlaın-baspasóz máslıhaty ótti. Sharaǵa «SQ-Farmasııa» JShS basqarma tóraǵasy Berik Shárip qatysty.
Jıyn barysynda ol dári-dármekterdi elimizdiń medısınalyq uıymdaryna jetkizý josparly túrde júzege asyrylyp jatqanyn atap ótti.
«2020 jylǵa arnalǵan biryńǵaı dıstrıbıýtorlardyń tizimine 259 mlrd teńge somasyna 1385 dári-dármek pen medısınalyq maqsattaǵy buıym alýǵa shart jasaldy. Epıdemııalyq jaǵdaıdy eskere otyryp, biryńǵaı dıstrıbıýtor respýblıkanyń medısınalyq uıymdaryn dári-dármektermen jáne medısınalyq maqsattaǵy buıymdarmen úzdiksiz qamtamasyz etý úshin sharalar qabyldaǵanyn atap ótkim keledi. 86 mlrd teńgeniń dári-dármekteri respýblıka boıynsha medısınalyq uıymdarǵa jóneltildi. Sonyń ishinde dári-dármekterdi ambýlatorııalyq negizde qabyldaǵan pasıentterge 47 mlrd teńgege dári-dármek jetkizildi. Sonymen qatar 27 mlrd teńge mólsherinde dári-dármek tegin berildi. Respýblıkadaǵy aýrýhanalarǵa 39 mlrd teńgege dári-dármekter men medısınalyq maqsattaǵy buıymdar jiberildi. Bul aýrýhanada emdeletin pasıentterdi úzdiksiz qamtamasyz etý úshin jetkilikti bolýy kerek. Qazirgi ýaqytta medısınalyq uıymdarda koronavırýs ınfeksııasyn juqtyrǵan 10 myńnan astam yqtımal naýqasty emdeýge jetkilikti dári-dármek bar», dedi B.Shárip.
Sonymen qatar ol, elimizge AQSh, Qytaı, Ońtústik Koreıa, Japonııa, Túrkııa jáne BAÁ-den gýmanıtarlyq kómek kórsetilgenin jáne Qazaqstannyń iri kompanııalary COVID-19 epıdemııasy jaǵdaıynda otandastaryna barlyq múmkin kómekti kórsetip jatqandaryn jetkizdi.
«Aıta ketetin taǵy bir jaıt, búgingi tańda buqaralyq aqparat quraldarynda, áleýmettik jelilerde «Eýtıroks» preparatynyń jetispeýshiligine qatysty másele kóterilýde. Soǵan túsinik bergim keledi. «Eýtıroks» preparaty Mindetti áleýmettik medısınalyq saqtandyrý júıesindegi dári-dármekter men medısınalyq maqsattaǵy buıymdardyń tizimine engizilgen. Preparatty gıpotıreoz, gıpoparatıreoz dıagnozymen tirkelgen barlyq naýqas qabyldaı alady. Preparat alty dozada Biryńǵaı dıstrıbıýtordan satyp alynatyn dári-dármekter tizimine engizilgen. Jetkizý kestesine sáıkes osy ýaqytqa deıin josparlanǵan barlyq ónim Biryńǵaı dıstrıbıýtordyń qoımalaryna kelip, medısınalyq uıymdarǵa olardyń suranysy boıynsha jetkizildi. Osy «Eýtıroks» dárisi negizinde biz 158 mln teńgege shart jasastyq. 68 mln teńgege bul dári-dármek barlyq medısınalyq mekemelerge jetkizildi. Sondyqtan ol jetkilikti», dedi Basqarma tóraǵasy.