Zańsyz balyq aýlaǵandardyń ash bolmaǵany anyq. Satyp paıda tabýdy kózdegen Shardara aýdanynyń eki turǵynyn Sozaq aýdandyq polısııa basqarmasynyń tabıǵatty qorǵaý ýchaskelik ınspektorlary quryqtady. Zańsyz aýlap, ony tasymaldaýmen aınalysqan kúdiktiler «Mersedes-bens» avtokóligine tıegen 6 sentnerge jýyq balyq tárkilengen.
Atalǵan jaıtty polısııa qyzmetkerleri «Balyq resýrstaryn, basqa da sý janýarlaryn nemese ósimdikterdi zańsyz aýlaý» deregi boıynsha tirkedi. Qazirgi ýaqytta sotqa deıingi tergeý amaldary júrgizilýde.
Brakonerlik pen zańsyz balyq aýlaýdyń taǵy bir deregi Ordabasy aýdanynda anyqtaldy. Keshkilik reıdtik is-sharalar barysynda polısııa qyzmetkerleri Bógen kólinde balyq aýlaýmen aınalysqan brakonerdi ustady. Ol qaıyq pen elektrli qural-jabdyqtarmen zańsyz balyq aýlaǵan jergilikti turǵyn bolyp shyqty. Kúdiktiden aıǵaq zat retinde bir qap balyq tárkilendi. Tártip buzýshyǵa qatysty sotqa deıingi tergeý amaldary júrgizilýde.
Túrkistan oblysy