Jyl ishindegi aılardyń sultany atanǵan qasıetti Ramazan aıy qarsańynda Aqtóbe oblystyq máslıhatynyń depýtattary men oblystyq ortalyq «Nur Ǵasyr» meshitiniń jamaǵaty saýaby mol is-sharaǵa uıytqy bola bildi. Sóıtip «Biz birgemiz!» qaıyrymdylyq aksııasy aıasynda 99 múgedek balaǵa qomaqty qorjyndar taratyldy. Azyq-túliktiń 22 túri salynǵan syılyqtyń jalpy somasy 2 000 000 teńgeni quraıdy.
Osy arqyly oblystyq máslıhat depýtattary múgedek balalardy qorǵaı bilýdi dástúrge aınaldyryp keledi dese de bolady. О́ıtkeni olar buǵan deıin de birneshe ret qaıyrymdylyq sharasyn ótkizýge bastamashy bolǵan-dy. Al bul joly olar kóńilderi orta jetkinshekterge kómektesý úshin árqaısysy 200 myń teńgeden qarajat jınapty.
– Ata-babalarymyz Ramazan aıynda joq-jitik, muqtaj jandarǵa kóbirek kóńil bólip, qoldaý kórsetýdi jón sanaǵan eken. Qasıetti Islam dininde Alla taǵalanyń 99 esimi bar ekeni aıtylǵan ǵoı. Bul tekten-tek bolmasa kerek. Sondyqtan da biz soǵan sáıkes 99 múgedek balaǵa qaıyrymdylyq jasaý jóninde ortaq sheshimge keldik, – dedi bul jóninde Aqtóbe oblystyq máslıhatynyń depýtaty Ǵalymjan Eleýov.
Sondaı-aq onyń áriptesi Sergeı Vıshnıaktyń tujyrymdaýynsha, múmkindigi bar adam muqtaj jandarǵa shyn nıetimen kómek berse, budan ózi de sheksiz lázzat alyp, kóńili jaılanady. Mundaı kezde olardyń alǵysy men rızashylyǵyn alýdyń ózi bir mereı. Osyndaı qaıyrymdylyq sharasynyń ortasynda bolǵanym úshin de ózimdi baqytty bir sátti bastan keshkendeı rııasyz bir kúı keshtim dedi ol budan ári.
Máslıhat depýtattarynyń osynaý júrekjardy lebizderi olardyń qorjynǵa qosa jan shýaǵyn qosa syılaǵanynyń belgisi dep bilemiz.
Aqtóbe