«Jaý jaǵadan alǵanda bóri etekten» degendeı, Úrjar aýdany Kóktal aýylynyń turǵyndaryna myna jaǵdaı ońaıǵa tımeı tur. Aýyl halqy tótennen kelgen indettiń qoradaǵy azyn-aýlaq iri qarasyn qynadaı qyryp bara jatqanyna alańdaýly.
«Bizdiń túsinbeı otyrǵanymyz, eki aptadaı ýaqyt ótse de, aýylymyzdy áli karantınge japqan joq. Malymyz qyrylyp jatyr. Qoramyzda tigerge tuıaq qalmaı barady. Shynyn aıtsaq, aýylda osy mal úshin otyrmyz. Ári qaraı qalaı ómir súremiz?» deıdi Kóktal aýylynyń turǵyny Elena Toıǵanbaeva.
Aýyl turǵyndarynyń aıtýynsha, qazirgi ýaqytta eldi mekende tosyn indetten aram qatqan iri qara sany shamamen 200-den asyp ketken. Bir ǵana «Muhıt» sharýa qojalyǵynda 50 buzaý, 20 iri qara indettiń qurbanyna aınalypty. «Búgin mine, aýdannan, oblystan mamandar kelip, ólgen maldardy sanap jatyr. Myna indet janymyzdaǵy «Aıan» sharýa qojalyǵynyń malynan tarady. Biz bul sharýa qojalyǵyna narazylyq bildirip, tıisti oryndarǵa hat jazdyq», dedi úı telefony arqyly sóılesken osy eldi mekenniń turǵyny Názıgúl Shalǵynbaeva. Bul kisi «Muhıt» sharýa qojalyǵynyń jetekshisi Sársen Shalǵynbaevtyń joldasy eken.
Osy aýyldyń taǵy bir turǵynymen úı telefony arqyly sóıleskenimizde bıýdjettik mekemede jumys isteıtindikten atyn atamaýymyzdy ótindi. «Aýyldaǵy úlken kisiler muny aýsyl indeti dep boljap otyr. Kóktaldaǵy alǵashqy iri qaranyń ólimi 9 sáýirde tirkelgen. Sodan soń eki-úsh kún ótkennen keıin aýdannan mamandar kelip, synama alyp ketken. Ol synama muzdatqyshta saqtalyp turǵan kórinedi. Al 21 sáýirde buzaýdan synama aldy. Bul synama nátıjesi qalaı bolar eken dep alańdap otyrmyz. О́ıtkeni aýyl turǵyndary maldary óle bastaǵannan keıin ártúrli dárilerdi ózderi ekken bolatyn», deıdi aýyl turǵyny.
Aıdyń-kúnniń amanynda belgisiz indettiń maldaryn jaıpap bara jatqanyna alańdaǵan aýyl turǵyndary eldi mekendi tez arada karantınge jaýyp, ólgen maldarynyń shyǵyny ótelýi kerektigin surap otyr. Al jergilikti veterınarlar ólgen iri qaradan synamalar alynyp, tıisti oryndarǵa jiberilgenin, aýyldy karantınge jabý-jappaý máselesi synama qorytyndysynan soń belgili bolatynyn aıtady.
Kóktal aýylynda uıaly telefon baılanysy nashar bolǵandyqtan, osy eldi mekende júrgen komıssııa múshelerimen sóılesýdiń múmkindigi bolmady. Aýylda qansha mal belgisiz indettiń qurbanyna aınalǵanyn, aýyl turǵyndaryna qyrylǵan iri qarasy úshin ótemaqy tólenip-tólenbeıtinin komıssııa anyqtaıtyn bolady.
Shyǵys Qazaqstan oblysy,
Úrjar aýdany,
Kóktal aýyly