Ulttyq ekonomıka vıse-mınıstri Mádı Takıev Ortalyq kommýnıkasııalar qyzmetinde ótken onlaın brıfıngte kásipkerlikti qoldaý úshin qandaı salyqtyq jeńildikter jasalatynyn aıtty.
«Tótenshe jaǵdaı kezinde Úkimet Memleket basshysynyń tapsyrmasy boıynsha shaǵyn jáne orta bıznesti qoldaý úshin jedel sharalar qabyldady. Olar bıznestiń qarjylandyrýǵa qoljetimdiligin arttyrýdy, qosymsha salyqtyq yntalandyrýdy iske asyrýdy, bıznesti tekserýlerden shekteýdi kózdeıdi. Memleket basshysynyń «Ekonomıkany turaqtandyrý jónindegi odan arǵy sharalar týraly» Jarlyǵyna sáıkes bıznesti qoldaý úshin birqatar salyqtyq shara qabyldandy», - dedi Mádı Takıev.
Vıse-mınıstrdiń aıtýynsha, salyqtyq jeńildikter saýdadan bastap týrıstik bızneske deıin ekonomıkanyń túrli sektorlaryn qamtıdy.
«Jyl sońyna deıin saýda-oıyn-saýyq ortalyqtary, kınozaldar, teatrlar, kórmeler men sport obektileri, qoǵamdyq tamaqtaný, qonaq úı jáne týrıstik qyzmet salalarynda jumys isteıtin salyq tóleýshiler boıynsha múlik salyǵynan bosatý belgilendi. Sondaı-aq jeke praktıkamen aınalysatyn tulǵalar, notarıýster, advokattar, sot oryndaýshylary, medıatorlar osy jyldyń 1 qazanyna deıin múlik salyǵynan bosatyldy», dedi ol.
Sondaı-aq vıse-mınıstrdiń málimetinshe, jalpyǵa birdeı belgilengen tártippen jumys isteıtin jeke kásipkerler jyldyń sońyna deıin jeke tabys salyǵynan bosatyldy.
«Iri qara mal men asyl tuqymdy balapandardy qamtıtyn agroónerkásiptik keshendegi bıologııalyq aktıvteriniń ımportyna qosylǵan qun salyǵy salynbaıdy. Aýyl sharýashylyǵy ónimderin óndirýshiler aýyl sharýashylyǵy maqsatyndaǵy jerler boıynsha jer salyǵyn tólemeıdi. Áleýmettik mańyzy bar azyq-túlik taýarlary úshin qosylǵan qun salyǵynyń mólsherlemesi 2020 jyldyń 1 qazanyna deıin 12 paıyzdan 8 paıyzǵa deıin tómendetildi. Mıkro, shaǵyn jáne orta bıznes sýbektileri 2020 jylǵy 1 sáýirden bastap 1 qazanǵa deıin 29 qyzmet túri boıynsha eńbekaqy tóleý qorynan salyq jáne basqa da mindetti tólemderden bosatyldy. Epıdemııaǵa qarsy is-sharalarǵa tartylǵan qyzmetkerlerge tólenetin ústemaqy eńbekaqy tóleý qoryna salynatyn barlyq salyqtar men áleýmettik tólemderden bosatyldy», dedi ol.