Qazaqstannyń JASA TEAM komandasynyń músheleri Omar Aserbekov pen Grıgorıı Shýkın Alpidegi eń kúrdeli klassıkalyq baǵyttardyń birin baǵyndyrdy, dep habarlaıdy Egemen.kz.
Almaty qalasy ákimdiginiń málimetinshe, olar Bern Alpilerindegi Eıger shyńyna (3 970 m) Hekmaıerdiń klassıkalyq baǵyty arqyly kóterildi. Bul álemdik alpınızmdegi eń áıgili ári tehnıkalyq jaǵynan kúrdeli baǵyttardyń biri. 1935 jyldan beri munda 60-tan astam adam qaza tapqan.
Shyńǵa kóterilý eki jarym kúnge sozyldy. Komanda maýsymda alǵash bolyp jolǵa shyqqandyqtan, burynǵy alpınısterdiń izi bolmaǵan, olar jol salyp, jartastardy qardan tazartyp otyrdy. Birinshi kúni qabyrǵanyń úshten eki bóligin júrip ótip, «О́lim bıvýagynda» shatyrsyz, saqtandyrý núktelerine baılanǵan kúıde túnep shyqty. Ekinshi kúni eń kúrdeli tehnıkalyq joǵarǵy bólikti eńserip, shyńǵa jetti birden túsýge kiristi. Úshinshi kúni aman-esen tómen tústi.
Aıta keteıik, Eıger Alpidegi «alty uly soltústik qabyrǵanyń» qataryna kiredi. 2025 jyly Aserbekov pen Shýkın Ptı-Drıý jáne Grand-Joras taýlarynyń soltústik qabyrǵalaryn da baǵyndyrǵan bolatyn. Osylaısha olar bir maýsymda baǵdarlamadaǵy eń kúrdeli úsh qabyrǵany eńsergen.
Baǵyt tolyq avtonomdy stılde, ıaǵnı gıdsiz, sherpasyz jáne aldyn ala daıyndyqsyz ótti. Segiz myńdyq shyńǵa uıymdastyrylatyn kommersııalyq ekspedısııalardan aıyrmashylyǵy, munda marshrýt boıyna saqtandyrý arqandary aldyn ala ilinbeıdi. Komanda tolyqtaı óz kúshine súıendi. Bul alpınızmniń eń talapshyl baǵyttarynyń biri sanalady.
Alqynbaıtyn alpınıst
Eıger ataýy nemis tilinen aýdarǵanda «adam jegish» degen maǵynany bildiredi. Onyń soltústik qabyrǵasynda 1935 jyldan beri keminde 64 alpınıst qaza tapqan. Osy sebepti ol Mordwand – «qaterli qabyrǵa» degen ataýǵa ıe bolǵan. HH ǵasyrdaǵy baspasózde bul baǵyt «О́lim qabyrǵasy» degen atpen keńinen tanyldy. Hekmaıer baǵyty (6A sanaty) jartasty jáne muzdy relefte joǵary deńgeıdegi órmeleý sheberligin, shekteýli saqtandyrý jaǵdaıynda qozǵalý tájirıbesin jáne úlken fızıkalyq tózimdilikti talap etedi. Marshrýt boıynda tik jartastar, muz alańdary jáne qatqan muz aralas kúrdeli ýchaskeler kezektesip keledi. Bıiktik aıyrmasy shamamen 1800 metr. Bul qabyrǵa tas qulaýy, qar kóshkini jáne aýa raıynyń kenet ózgerýimen de qaýipti.
JASA TEAM quramyndaǵy Aserbekov pen Shýkınniń jetistigi otandyq alpınızmniń joǵary deńgeıin kórsetedi. Qazaqstan sportshylarynyń jańa býyny buryn eýropalyq alpınıster basymdyq tanytyp kelgen tehnıkalyq elıtalyq alpınızm baǵyttaryn meńgere bastady.
Han Táńiri bıigin baǵyndyrǵan