Elordada dezınfeksııalaý jumystary jalǵasyp jatyr. Qalany zalalsyzdandyrý jumystary birneshe kezeńmen júrgiziledi. 20 mln.sharshy metrden astam aýmaq dezınfeksııalandy. Áleýmettik nysandar, bazarlar, saýda oıyn-saýyq ortalyqtary, blokposttar jáne ózge de adam kóp jınalatyn oryndardy dezınfeksııalaýǵa basa mán beriledi. Bul týraly elorda ákimdiginiń baspasóz qyzmeti habarlady.
Sonymen qatar kvartalaralyq aýmaqtar, turǵyn úıler, úıdiń kireberisteri men lıftilerine dezınfeksııa jasalady. Sondaı-aq kósheler men elorda magıstraldary zalalsyzdandyrylady. Elorda ákiminiń orynbasary Altynbek Qaısaǵalıevtiń aıtýynsha ınfeksııa aǵashtarda, joldarda jáne t.b jerlerde de turyp qalýy múmkin.
Qalany dezınfeksııalaý jumystaryna kommýnaldyq qyzmettermen birge Qorǵanys mınıstrliginiń qyzmetkerleri, TJD jáne mamandandyrylǵan kompanııalardyń qyzmetkerleri de qatysyp jatyr. Ondaǵan órt sóndirý jáne arnaıy tehnıkalar jumyldyrylǵan. Dezınfeksııalaý jumystary jaıaý da, arnaıy mashınalardyń kómegimen shashý arqyly da júrgiziledi.
Eske sala keteıik, 2020 jyldyń 11 mamyrynan bastap turǵyndarǵa áleýmettik dıstansııa men sanıtarlyq normalardy qatań saqtaı otyryp, parkterge, alańqaılar men skverlerge barýyna ruqsat berildi. Osyǵan baılanysty atalǵan aýmaqtarda dezınfeksııalaý jumystary kúsheıtildi.
-Qazir adamdar serýendeýge shyǵyp jatqandyqtan bizder balalar alańyn, oryndyqtardy, qoqys jáshikterin zalalsyzdandyryp jatyrmyz. Sebebi ol jerlerdiń bárinde adamdar júredi. Adamdardy qorǵaý - bizdiń jumysymyz, - dedi «Astana dezınfeksııa» JShS entemology Aıman Isına.