Fýtzaldan osy jyldyń kúz aılarynda Lıtvada jalaýy jelbireýge tıis álem chempıonaty keıinge shegerildi. Endi ol kelesi jyldyń 12 qyrkúıegi men 3 qazan aralyǵynda ótedi.
Aıtýly jarystyń tusaýy 1989 jyly kesildi. Nıderlandta uıymdastyrylǵan tuńǵysh týrnır Brazılııa quramasynyń jeńisimen aıaqtaldy. Odan keıin dop dodasy taǵy jeti márte ótti. Ońtústik Amerıkanyń oǵlandary taǵy tórt márte (1992, 1996, 2008, 2012) top jarsa, Ispanııanyń fýtzalshylary eki ret (2000, 2004) dara shyqty. Sońǵy jarystyń jalaýy osydan tórt jyl buryn Kolýmbııada jelbiredi. Bul tartysta Argentınanyń asyǵy alshysynan tústi. Fınalda olar Reseıdi 5:4 esebimen utty. Qola medal Iranǵa buıyrdy.
Qazaqstan quramasy álem chempıonatyna eki ret qatysty. 2000 jyly toptyq týrnırde súrinsek, 2016 jyly bul mejeden kedergisiz óttik. Alǵashqy kezeńde Argentınaǵa jol bergenimizben, Kosta-Rıka men Solomon araldary ókilderin oısyrata uttyq. Biraq odan árige bara almadyq. 1/8 fınalda jerlesterimiz Ispanııaǵa ese jiberdi.