Memleket basshysy Qasym-Jomart Toqaevtyń tóraǵalyǵymen ótken Tótenshe jaǵdaı jónindegi memlekettik komıssııanyń qorytyndy májilisi eldi eleńdetken saýaldarǵa salaýatty jaýap berip, kóńildegi kóp kúdikti seıiltti.
BAQ arqyly taraǵan: «Tótenshe jaǵdaı rejimin qamtamasyz etý jónindegi memlekettik komıssııa aýqymdy jumys atqardy. Halyqtyń densaýlyǵyn qorǵaý, olardyń tabysyn arttyrý jáne bıznesin qoldaý úshin 500-ge jýyq sheshim qabyldanyp, júzege asyryldy. Endi tótenshe jaǵdaı rejimin qamtamasyz etý jónindegi komıssııa Ekonomıkalyq ósimdi qalpyna keltirý jónindegi memlekettik komıssııa bolyp qaıta qurylady. Búgin búkil elimizdegi tótenshe jaǵdaı rejimi aıaqtaldy. Alaıda keıbir aımaqtarda derttiń taralýy báseńdemeı otyr.Soǵan qaramastan kóptegen salanyń qyzmeti qalpyna kele bastady. Qazirdiń ózinde 1 mıllıon 100 myńnan astam azamat jumysqa shyqty. Endi elimiz boıynsha dúkenderdiń birazy ashylady, sán salondarynyń, bilim ortalyqtarynyń, taǵy basqa nysandardyń qyzmeti qaıta jandana bastaıdy. Saıabaqtar ashylady. Jolaýshylarǵa arnalǵan áýe tasymalynyń jumysy qalpyna keledi. Buǵan deıin 6 qalanyń áýejaıy ashylǵan bolatyn. Endi oǵan taǵy 7 qala qosylady» degen sózder alpys kún boıy tórt qabyrǵaǵa qamalǵan halyqtyń kóńilindegi tuman men kúmándy serpip tastady. Tótenshe jaǵdaı rejimin qamtamasyz etý jónindegi komıssııanyń endi ekonomıkalyq ósimdi qalpyna keltirý jónindegi komıssııa bolyp qaıta qurylýy – kóptiń kóńilinen shyqqan óte tapqyr, asa aqyldy, parasatty sheshim.
Tótenshe jaǵdaılar jónindegi memlekettik komıssııanyń qorytyndy májilisinde: «Áıtse de kóptegen shekteý alynyp tastalǵanyna qaramastan, kúndelikti ómirde saqtyq sharalaryn qatań ustaný mańyzdy bolyp qala bermek. Atap aıtqanda, shaǵyn, orta, iri kompanııalar jańa erejelerge sáıkes jumys isteýi kerek. Áleýmettik araqashyqtyqty saqtaý, kópshilik jınalǵan jerde betperde taǵyp júrý qalypty jaǵdaıǵa aınalýǵa tıis. Oblystar arasyndaǵy kólik qatynasyna qatysty shekteýler qala beredi. Qoǵamdyq kólikter jartylaı júktememen jumys isteıdi. Jolaýshylardan betperde taǵý talap etiledi. Kóshede toptasyp júretinder 3 adamnan aspaýy kerek. Memlekettik qyzmetshilerdiń 50 paıyzy qashyqtan jumys isteı beredi. Jeke kásiporyn basshylary qansha qyzmetkerdi jumysqa shyǵaratynyn ózderi anyqtaýǵa tıis», dep qadap aıtyldy. Bul da halyqtyń oıyn dóp basqan óte oryndy, parasatty sheshim.
Taǵy bir jan súısintken jaqsy habar – Memleket basshysy «5-10-20» jańa turǵyn úı jobasy qabyldanatynyn jetkizdi. Bul basty ýaıymy baspana bolǵan talaılardyń armany oryndalyp, baǵy janady degen sóz!
Barlyq qajetti sharalardy der kezinde shuǵyl jasap, asa qaterli derttiń aldyn alǵan Prezıdent bul joly da ózine tán salıqalylyqpen kóptiń kóńilinen shyqqan parasatty sheshim qabyldady.
Sábıt DOSANOV,
Memlekettik syılyqtyń laýreaty
Almaty