Senattyń Áleýmettik-mádenı damý jáne ǵylym komıtetinde «Ulttyq aýdarma bıýrosy» qoǵamdyq qorynyń basshylyǵymen kezdesý boldy. Bul týraly Senattyń baspasóz qyzmeti habarlady.
Komıtet tóraǵasy Murat Baqtııaruly álemniń jetekshi ýnıversıtetteriniń úzdik oqýlyqtaryn memlekettik tilge aýdarý jáne jalpy jobanyń nátıjesin baǵalaý jóninde uıym qyzmetin qorytyndylaýǵa baǵyttalǵan kezdesýdiń negizgi maqsatyn atap ótti.
Qoǵamdyq qordyń atqarýshy dırektory Raýan Kenjehanulynyń aıtýynsha, «Jańa gýmanıtarlyq bilim. Qazaq tilindegi 100 jańa oqýlyq» jobasynyń aıasynda tarıh, fılosofııa, áleýmettaný, psıhologııa jáne taǵy basqa salalar boıynsha qazirgi zamanǵy úzdik kitaptar memlekettik tilge aýdarylýda. Elimizdiń aldyńǵy qatardaǵy oqý oryndary jáne oqytýshylar, ǵalymdar, ádebıetshiler men baspagerler arasynan 300-den astam mamandar oqýlyqtardy aýdarý jumysyna atsalysty. Oqýlyqtar mátinderi ádebı jáne ǵylymı redaksııalaýdan birneshe márte ótedi.
Kezdesý barysynda T.Júrgenov atyndaǵy Qazaq ulttyq óner akademııasynyń prorektory Sháripbek Ámirbekov qashyqtan sóz alyp, osy joba aıasynda oqýlyqtardy aýdarý sapasy boıynsha taldaý nátıjeleri týraly aıtty.
Kezdesýge qatysýshylar aýdarma isin damytýdaǵy aǵymdaǵy máselelerdi jáne kitaptardy memlekettik tilge aýdarýdyń keleshegin talqylady.
Sharaǵa bilim jáne ǵylym, mádenıet jáne sport mınıstrlikteriniń ókilderi qatysty.