Senattyń Konstıtýsııalyq zańnama, sot júıesi jáne quqyq qorǵaý organdary komıtetiniń keńeıtilgen otyrysy ótti. Onda Ákimshilik rásimdik-prosestik kodekstiń jobasyn jáne oǵan qatysty ózge de zańnamalyq aktilerge engiziletin ózgerister qaraldy.
Senatorlar sondaı-aq atqarýshylyq is júrgizý men qylmystyq zańnamany jetildirýge baǵyttalǵan ózgerister men tolyqtyrýlardy talqylady. Bul týraly Senattyń baspasóz qyzmeti habarlady.
Kodeksti bekitýdegi negizgi maqsat – azamattardyń basqarýshylyq sheshimderdi qabyldaý prosesine shynaıy qatysýyna múmkindik beretin kepildemelerdi bekitý, bılik organdarymen daý-damaı týyndaǵan jaǵdaıda jáne ony qaraý kezinde azamattardyń quqyǵyn qorǵaýdyń tıimdi tetikterin aıqyndaý bolyp otyr.
Ákimshilik rásimdik-prosestik kodeksti qabyldaý elimizdiń ózge de zańnamalyq aktilerine ózgerister men tolyqtyrýlar engizýdi qajet etedi. Osy sebepti «Qazaqstan Respýblıkasynyń keıbir zańnamalyq aktilerine Qazaqstan Respýblıkasynyń ákimshilik rásimdik-prosestik zańnamasy máseleleri boıynsha ózgerister men tolyqtyrýlar engizý týraly» zań jobasyna sáıkes 75 zańǵa, onyń ishinde 10 kodekske túzetýler engiziletin bolady.
Senatorlar sonymen qatar Parlament depýtattary bastamashy bolǵan atqarýshylyq is júrgizý jáne qylmystyq zańnamany jetildirý máselesin qarady.
Zań jobasynyń negizgi maqsattarynyń biri – jala jabý babyn dekrımınalızasııalaý bolyp tabylady. Elimizdiń Prezıdenti Q.Toqaev Ulttyq qoǵamdyq senim keńesiniń otyrysynda Qylmystyq kodekstiń 130-babyn dekrımınalızasııalaý týraly sheshimniń qabyldanýyna bastamashy bolǵany belgili.
Atalǵan zań jobasy azamattar men zańdy tulǵalardyń atqarýshylyq óndiris kezindegi quqyǵyn qorǵaýdy jáne iske asyrýdy, múliktik quqyqtaryn qorǵaýdy qamtamasyz etedi, sondaı-aq qylmystyq jáne ákimshilik zańnamany jetildirýge yqpal etedi.
Zań jobalaryn qaraý nátıjesinde komıtet tóraǵasy Vladımır Volkov olardyń qabyldanýy sot oryndaýshylary qyzmetiniń qarqyndy damýyn qamtamasyz etetinin, májbúrli oryndaýdyń jáne konstıtýsııalyq sóz bostandyǵynyń iske asyrylý tıimdiligin arttyratynyn, bul óz kezeginde elimizdegi demokratııalyq prosesterdiń damýyna oń yqpal etetinin atap ótti.
Zań jobalary Palata otyrysyna joldandy.