Reseıdiń Astrahan oblysyndaǵy Selıtrennoe aýylyna jaqyn jerde júrgizilgen arheologııalyq qazba jumystary barysynda ǵalymdar jańa artefaktilerdi tapty, - dep jazady halyqaralyq Túrki akademııasynyń baspasóz qyzmeti.
Arheologııalyq ekspedısııanyń ǵylymı jetekshisi Evgenıı Pıgarev, Altyn Ordanyń astanasy sanalǵan Saraı-Batý qalasy jaqynda óz ataýyn ózgertýi múmkin dep sanaıdy.
"Zertteý barysynda biz buryn ǵalymdarǵa belgisiz bolyp kelgen tyń ǵylymı jańalyqqa qol jetkizdik. Bul málimetter bizge XIV-XV ǵasyrlardaǵy Altyn Ordanyń astanasynda bolǵan kóptegen damý úrdisterine jańasha kózqaraspen qaraýǵa múmkindik beredi. Buryn Selıtrennoe aýylynyń astynda XIII ǵasyrdyń mádenı qabattary ornalasqan dep eseptelingen. О́z kezeginde bul ǵalymdarǵa Selıtrennoe qalashyǵy Altyn Ordanyń alǵashqy astanasy Saraıdyń (Saraı Batý) qalasynyń orny degen boljam jasaýǵa múmkindik bergen. Endi bizge Selıtrennoe qalashyǵyn Saraı ál-Jádıd, ıaǵnı Jańa Saraı qalasy dep aıtýǵa tolyq negiz bar", – dep túsindirdi ǵalym.
Aıta ketý kerek, buǵan deıin Selıtrennoe qalashyǵy Saraı Batý, al Volgograd oblysyndaǵy Sarev qalashyǵy Saraı Berke (Saraı ál-Jádıd, Jańa Saraı) dep eseptelgen edi. Qazirgi tańda zertteýshilerdiń kópshiligi Gúlistan qalasy Sarev qalashyǵynyń ornynda, al Saraı ál-Jádıd qalasy Selıtrennoe qalashyǵynyń ornynda bolǵan degen boljamdy qoldaıdy.
E. Pıgarev Selıtrennoe aýylynyń ornynan tabylǵan nýmızmatıkalyq oljalardan XIV–XV ǵasyrlardyń kóptegen monetalarynyń shyqqandyǵyn, al XIII ǵasyrǵa tıesili monetalardyń tabylmaǵandyǵyn atap ótti. Munyń bári Altyn Ordanyń ekinshi astanasy – ortaǵasyrlardyń uly bıleýshileriniń biri О́zbek hannyń kezinde salynǵan Saraı ál-Jádıd qalasy (Jańa Saraı) bolǵandyǵyn bildiredi.