Bıyl Oral qalasynda 2013 oqýshy mektep bitirdi. Onyń ishinde 86 túlek altyn belgi ıegeri atandy. Úlken ómirge qanat qaqqan túlektermen Oral qalasynyń ákimi Abat Shynybekov onlaın kezdesý ótkizdi. Jıyn sońy syılyqsyz bolmady, dep habarlaıdy Egemen.kz
Bıyl "Altyn belgi" alǵan 61 túlek qazaq mektebin, 25-i - orys tilinde blim beretin mektepti támamdaǵan. Buǵan qosa 70 túlek úzdik attestat ıegeri atandy. Mektep bitirýshilerdiń 84 paıyzy aldaǵy Ulttyq biryńǵaı test synaǵynda baq synamaq.
Qala basshysy óz sózinde 9 túlegi «Altyn belgige» ıe olǵan №42 mektepti, 8 «altyny» bar №44 mektep-gımnazııany, 7 oqýshysy mektepti altyn belgige bitirgen №30 mektepti arnaıy atap, úzdik oqýshylar men olardyń ustazdaryn úlken jetistigimen quttyqtady.
"Álemdi jaılaǵan pandemııaǵa baılanysty elimizde tótenshe jaǵdaı jarııalanyp, saqtyq sharalaryn saqtaý maqsatynda mektepter qashyqtan oqytyp, bıylǵy sońǵy qońyraý rásimi onlaın túrde ótti. Árqashan da ustazdar men ata-analardyń qýanyshtaryna tilektespiz, degenmen qaterli derttiń qaýpi seıilgen joq. Saqtyq sharalary balalarymyzdyń amandyǵy úshin jasalyp otyr. Syndarly sátte qıyn jaǵdaıǵa qaramastan oqýshylardy bilim nárimen sýsyndatyp, oqý úrdisin nátıjeli uıymdastyra bilgen ustazdarǵa, balalarǵa tireý bolyp, qoldaý bildirgen ata-analar qaýymyna zor alǵysymdy bildiremin!", dedi Abat Abaıuly.
Onlaın kezdesýde oqýshylar tarapynan №42 mektep-gımnazııa túlegi Ahat Ábdirahmanov, №46 mektepti bitirýshi Symbat Dáýletsharova sóz sóılep, alańsyz bilim alýǵa ustazdary men ata-analaryna, el aǵalaryna alǵys aıtty. Mektep bitirýshi túlekter atynan Aıana Qajymova men Álıhan Ajymuratov "Bir úıdiń balasyndaı" atty ándi syıǵa tartty.
Kezdesý sońynda mektep bitirýshi túlekterge qala ákimi atynan estelik kitap jáne baǵaly syılyqtar tabys etildi.
Batys Qazaqstan