Bıyl aqpan aıynda Nur Otan partııasy Tóraǵasynyń birinshi orynbasary Baýyrjan Baıbek Túrkistan oblysyna jumys saparymen kelgen bolatyn. Ol Jetisaıdaǵy qurylysy aıaqtalǵan jańa emhananyń jumysymen tanysyp, dárigerlermen kezdesti. Sol kezdesýde emhanaǵa medısınalyq qural-jabdyqtardyń áli 100 paıyz ornatylmaǵany, mekemeniń jumysqa tolyq kirispeı turǵany sóz bolǵan edi. B.Baıbek bul máseleni nazarda ustap, partııalyq baqylaý jasaý jóninde tapsyrma berdi.
Osyǵan sáıkes óńirdegi partııalyq baqylaý komıssııasy arqyly jumysshy top quryldy. Jumysshy top atalǵan máselelerdi qadaǵalap, tıisti zerdeleý jumystaryn júrgizdi. Nur Otan partııasy Túrkistan oblystyq fılıaly partııalyq baqylaý jónindegi ınspektory Asqar Erkinbekovtiń aıtýynsha, partııa Tóraǵasynyń birinshi orynbasarynyń tapsyrmasyna sáıkes jumystar júrgizilgen. Emhananyń ınternet júıesine qosylmaǵany, qurylys basqarmasy men medısına mekemesi arasynda qabyldaý-ótkizý aktisiniń túzilmegeni anyqtalyp, tıisti usynystar berilgen. Nátıjesinde, merdiger mekeme «Temır-Spesstroı» JShS óz qarjysymen 2020 jyldyń naýryz aıynda ınternet júıesin tartyp berdi.
Odan bólek, nysan oblystyq qurylys basqarmasy men paıdalanýshy mekeme «Jetisaı aýdandyq ortalyq aýrýhanasynyń» arasynda qabyldaý-ótkizý aktisimen resimdeldi. Qazirgi tańda atalǵan eki másele de sheshimin taýyp, emhana 1 sáýirden beri tolyq qýatynda jumys isteýde. Jalpy, emhananyń qurylysy 2017 jyly qazanda bastalyp, 2019 jyldyń 26 jeltoqsanynda aıaqtalǵan.
Jetisaı aýdandyq ortalyq aýrýhanasynyń bas dárigeri Nurlan Joldasbekovtiń málimdeýinshe, medısınalyq mekeme halyqqa sapaly qyzmet kórsetip jatyr.
«Mekemede 500-deı adam, atap aıtsaq, 80 dáriger, 300-deı orta býyn medbıke jáne 120 kishi medqyzmetker jumys isteıdi. Qalalyq emhanaǵa 501 mln teńgeniń qural-jabdyqtary alynǵan. Jabdyqtar Reseı, Italııa, Ońtústik Koreıa jáne ózge memleketterden jetkizilgen», deıdi ol.
Jedel járdem kórsetý stansasy men atalǵan emhana bir aýysymda 500 adamdy qabyldaıdy. Mundaǵy dárigerler men mamandardyń biliktiligin arttyrý boıynsha da tıisti jumystar qolǵa alynǵan. Jetisaılyq turǵyndarǵa qyzmet kórsetip jatqan jańa ǵımarat óńir turǵyndarynyń densaýlyǵyn jaqsartýǵa oń serpin beredi degen senim bar.