Kóshi-qon jónindegi halyqaralyq uıym BUU-nyń 90 múshe-memlekettiń, halyqaralyq uıymdar men azamattyq qoǵamnyń 300-ge jýyq ókilderiniń qatysýymen COVID-19 pandemııasy jaǵdaıynda mıgranttardy qorǵaý máselesi boıynsha vebınar ótkizdi. Bul týraly Syrtqy ister mınıstrliginiń baspasóz qyzmeti habarlady.
Is-sharanyń maqsaty COVID-19 pandemııasynan týyndaǵan jaǵdaıdy turaqtandyrý jóninde Úkimetter qabyldaǵan sharalar sheńberinde mıgranttarǵa kómek kórsetýde tájirıbe almasý boldy.
Onlaın is-sharany ashý rásiminde Kóshi-qon jónindegi halyqaralyq uıymnyń Bas dırektory Antonıo Vıtorıno bul máseleniń koronavırýspen jahandyq kúres aıasyndaǵy mańyzdylyǵyn atap ótti. Ol pandemııa jaǵdaıynda búkil álem boıynsha adamdardyń mobıldilik deńgeıi kúrt tómendegeni týraly aıtty. Odan ári Nıgerııa, Fransııa, Qazaqstan, Zımbabve jáne Egıpet ókilderi sóz sóıledi.
Jenevadaǵy QR-dyń BUU jáne basqa da halyqaralyq uıymdar janyndaǵy Turaqty О́kili Janar Aıtjanova óz sózinde Qazaqstannyń mıgranttardy qoldaýǵa, onyń ishinde tótenshe jaǵdaı men karantın kezinde sheteldikterdiń bolý erejelerin ázirleýge, mıgranttar úshin vızalar merzimin uzartýǵa, olarǵa gýmanıtarlyq kómek kórsetýge, sondaı-aq 500 qyrǵyz jáne júzdegen О́zbekstan azamattaryna memlekettik shekara arqyly ótkizýdi qamtamasyz etýge qabyldaǵan birqatar sharalaryn atap ótti.
Qazaqstandyq dıplomat elimizdiń Syrtqy ister mınıstrligi О́zbekstan jáne Tájikstandaǵy áriptesterimen 243 mıgrantqa tranzıttik dáliz usyný máselesinde ózara tabysty is-qımylyn atap ótti.
Sóz sońynda J.Aıtjanova Qazaqstan mıgranttarǵa álemde qalyptasqan kúrdeli epıdemıologııalyq jaǵdaıda kómek kórsetýdi jalǵastyrady dep málimdedi.