Almaty oblysynyń polıseıleri ákimshilik aıyppuldardy tóleýden jaltarǵandardy anyqtap jatyr, – dep habarlaıdy Polisia.kz.
Máselen, memleketke 28 mln teńgeden astam qaryzy bar adam ustaldy. Almaty oblysy aýmaǵynda polısııa qyzmetkerleri jeke sot oryndaýshylarynyń óńirlik palatasynyń, memlekettik kirister organdarynyń jáne Ádilet departamentiniń ókilderimen birlesip “Boryshker” jedel-aldyn alý is-sharasyn ótkizip jatyr. Is-sharanyń basty maqsaty – aıyppuldardy, salyq mindettemelerin, alımentterdi jáne basqa da tólemderdi tóleýden jaltaratyn júrgizýshilerdi anyqtaý.
Jedel aldyn alý sharasynyń birinshi kúniniń jumysy nátıjesi boıynsha boryshkerlerden jalpy somasy 8 mln.861 myń teńgege 680 aıyppul óndirilip alyndy. Jeke sot oryndaýshylarynyń qaýlylary negizinde jol qozǵalysy salasynda ákimshilik aıyppuldar boıynsha eleýli qaryzdary bar 13 avtokólik mamandandyrylǵan turaqtarǵa ornalastyryldy. Taldyqorǵan qalasynda jalpy somasy 28 mln 568 myń teńge kóleminde salyq jáne ákimshilik aıyppuldary boıynsha bereshegi bar Gazel avtokóligimen R. esimdi adam ustaldy.
Atqarýshylyq qujattardy ýaqtyly oryndamaǵany úshin onyń avtomashınasy memlekettik kirister organdarynyń mamandandyrylǵan turaǵyna ornalastyryldy. Budan ózge, boryshkerlerdi aýlalardy aralaý arqyly tekserý júzege asyrylyp jatyr.