Bilim jáne ǵylym mınıstri Ashat Aımaǵambetov Nur-Sultan qalasyndaǵy S. Seıfýllın atyndaǵy Qazaq agrotehnıkalyq ýnıversıteti bazasynda ornalasqan UBT ótkizý pýnktinde boldy. Vedomstvo basshysy talapkerlerdi aýdıtorııalarǵa kirgizý prosesin baqylap, olarǵa sáttilik tiledi.
"Balalardyń kóńil-kúıi óte jaqsy. Meniń oıymsha, atqarylǵan barlyq sharalar – testileý tapsyrý ýaqytyn uzartý, kalkýlıatorlardy paıdalanýǵa ruqsat etý, mekteptegi qorytyndy emtıhandardan bosatý jáne kóptegen tegin baıqaý synaqtary aıtarlyqtaı septigin tıgizdi. Atalǵan pýnktide ata-analar barynsha tártipti saqtap, balalaryn testileý pýnktine ákelgen soń birden ketip otyrdy. Bul óte mańyzdy. Elimiz boıynsha tańǵy saǵat 8-de barlyq balalar aýdıtorııalarǵa kirgizildi, óıtkeni balalardy kóshede ustamaı, UBT-ny ýaqytynda bastaý mańyzdy. Aýdıtorııalarda da balalar ádettegiden áldeqaıda az jáne balalardyń qaýipsizdigi úshin testileý tapsyrylatyn lekterdiń jalpy sany 5-ten 15-ke deıin uzartyldy. Sanıtarııa talaptary da tolyǵymen saqtalýda", dedi mınıstr.
Mınıstrliktiń málimdeýinshe, aýdıtorııalar tek 35%-ǵa deıin toltyrylǵan, árqaısysynda 10-18 adamnan. О́tken jyly bir aýdıtorııada ortasha eseppen 50 talapkerden bolǵan.
Bıyl elimiz boıynsha 131 755 adam UBT tapsyrýǵa nıet bildirgen, onyń 111 109-y nemese 82% osy oqý jylynyń mektep túlekteri. Jalpy, karantınge qaramastan, ótken jylmen salystyrǵanda UBT tapsyrýǵa nıet bildirgen túlekterdiń sany 12%-ǵa artyp otyr.