Álemdi jaılaǵan qarjylyq daǵdarysqa jáne basqa da sebepterge baılanysty eldegi úlestik qurylysta úlken problemalardyń oryn alǵany belgili. Birqatar qurylys salýshy kompanııalar qarjy tapshylyǵynan bastaǵan nysandaryndaǵy jumystardy aıaqtaýǵa dármensizdik tanytsa, endi bireýleri úleskerlerdiń aqshalaryn jınap alyp, ózderi qashyp ketti. Memlekettiń aralasýynyń arqasynda ǵana osy bir shıelenisti is sońǵy ýaqyttary birtindep sheshimin taba bastady.
Osyndaı qıyn jaǵdaıǵa dýshar bolǵandardyń qatarynda “Alıansstroıınvest” jaýapkershiligi shekteýli seriktestigi de bar bolatyn. Atap aıtqanda, “Infınıtı”, “Grasııa”, “Lesnaıa polıana” sııaqty turǵyn úı keshenderiniń taǵdyry dál osy qurylys kompanııasynyń qolynda. Al atalǵan úılerdiń olarǵa óz qarjylaryn salyp, baspanaǵa ıe bolamyz degen talaı-talaı jazyqsyz jandardyń úmitterin úkilegen dúnıeleri ekeni aıtpasa da túsinikti. Olaı bolsa, “Alıansstroıınvest” JShS-niń qazirgi ahýaly qandaı, ol aıaqtaýǵa tıis qurylystardyń keleshegi ne bolmaq degen saýaldyń kim-kimdi de qyzyqtyrary kúmánsiz.
Taıaýda seriktestik basshylyǵy buqaralyq aqparat quraldary ókilderimen kezdesip, óz jaǵdaılaryna qatysty aqparattarmen bólisti. “Alıansstroıınvest” JShS-niń qarjy dırektory A.Nuǵymanovtyń, josparlaý-óndiristik bóliminiń bastyǵy N.Botenovskaıanyń, klıentter-men jumys jónindegi bólim bastyǵy A.Kasapenkonyń qatysýymen ótken kezdesýde tómendegi jáıtter áńgime arqaýyna aınaldy.
Daǵdarysty kezeń sanalatyn 2007 jyldyń qazan aıy men 2009 jyldyń shilde aıy aralyǵynda ózderi de eleýli qıynshylyqtarǵa dýshar bolǵan seriktestiktiń qarjylyq áriptesteri buryn kelisilgen nesıelik jeliler boıynsha qarjy-landyrýdy toqtatyp tastaǵan. Osydan keıin kompanııa tolyqtaı qaıta qurýlarǵa baryp, tıimdiligi az jáne jumyssyz turǵan bólimshelerdi taratý, vakansııalardy jáne jumysshy mamandyqtaryn qysqartý, qyzmetkerlerdiń eńbekaqylaryn tómendetý esebinen shyǵyndardy azaıtý máselesin qarastyrýǵa májbúr bolady. Nesıelik qarjylar men úleskerler jarnala-rynyń bolmaýy úlestik qatysýdaǵy turǵyn úı qurylysy nysandaryndaǵy jumystyń toqtaýyna ákelip soqtyrady. Sóıtip, kompanııa bastalǵan qurylys nysandaryn aıaqtap shyǵýǵa qajetti qarjy taýyp bere alatyndaı balama ınvestorlar izdeýge kirisedi. Osylaısha, 2008-2009 jyldar qosymsha qarjylandyrý kózderin izdeýge, kelissózder júrgizý men kelisim-sharttar bekitýge ketedi.
Aqyry júrgizilgen jumystardyń nátıjesinde, 2008 jyly “ATF bank” AQ-tan 3 mıllıard teńge, 2009 jyly memlekettik Jyljymaıtyn múlik qorynan 1,7 mıllıard teńge qarjy tartylyp, osy jyldyń aıaǵynda jalpy kólemi 6,6 mıllıard teńgeni quraıtyn qarjylandyrý jelisi ashylady. Sonymen birge “Alıansstroıınvest” JShS “Lesnaıa polıana” turǵyn úı kesheniniń 4-10-kezekterin alý úshin “Samuryq-Qazyna” Jyljymaıtyn múlik qory” AQ-qa qosymsha ótinish beredi. Sóıtip, memlekettiń úleskerlerdiń qatysýymen salynyp jatqan qurylystarǵa qoldaý kórsetýi, “Samuryq-Qazyna” qory men ATF banktiń sheshim qabyldaýy arqasynda kompanııa úleskerlerdiń qatysýymen salynyp jatqan keshenderdegi qurylys jumystarynyń bárin de bastaýǵa múmkindik aldy.
Salynyp jatqan turǵyn úılerdiń ózindik qunyn arzandatý úshin seriktestik memlekettiń qoldaýymen sehtar men zaýyttardy iske qosty. Onyń ózi ındýstrııalyq-ınnovasııalyq damý baǵdarlamasyna qosylǵan belgili bir úles bolyp tabylady. 2010 jáne 2011 jyldary “Alıansstroıınvest” JShS shamamen bes myńdaı adamnyń turǵyn úı problemalaryn sheshýdi oılastyryp otyr.
Qarjynyń maqsatty jumsalýyn qamtamasyz etý turǵysynda da seriktestik qolǵa alǵan bastamalar bar. Máselen, germanııalyq “KVL” táýelsiz halyqaralyq aýdıtorlyq fırmasy turaqty negizde tartylyp otyr. Sol sııaqty jumys barysy men kompanııanyń is-qımyldaryna qoǵamdyq baqylaý ornatý úshin úleskerler birlestikteriniń ókilderi de seriktestiktiń jınalystary men tehnıkalyq keńes otyrystaryna únemi shaqyrylyp turady.
Seriktestik ókilderiniń aıtýlarynsha, “Alıansstroıınvest” JShS-degi qazirgi tańdaǵy jaǵdaı eshqandaı alańdaýshylyq týdyrmaıdy. Kompanııa bastalǵan qurylys nysandaryn mejelengen ýaqytynda aıaqtap qana qoımaı, sonymen birge jańa turǵyn úı keshenderi qurylysyn júrgizýdi de josparlap otyr.
Seıfolla ShAIYNǴAZY.