Halqymyzdyń bolmysynda ejelden qalyptasqan asarlatý uǵymy Áýlıeata topyraǵynda búginde qaıta jańǵyrýda. Jalpy, bir-birine kómek berý, bir jumysty birlesken túrde judyryqtaı jumyla atqarý sııaqty ıgi qasıetterdiń bul kúnde umyt bolyp bara jatqany shyndyq, - dep habarlaıdy Egemen.kz.
Osy oraıda, Jambyl óńirinde Elbasynyń «Bolashaqqa baǵdar: rýhanı jańǵyrý» baǵdarlamalyq maqalasynyń «Týǵan jer» arnaıy jobasy aıasynda Jambyl oblysynyń «Rýhanı jańǵyrý» jobalyq ofısi men Baızaq aýdandyq ákimdiginiń bastamasymen jáne aýyldaǵy azamattardyń qoldaýymen «Asarlatyp úı salý» jobasy qolǵa alyndy. Sol jaqsy dástúr qaıta jańǵyrtylyp, keminde óńirdegi 300 aýylǵa asarlatyp úı salynatyn boldy. Bul da bolsa aýyl turǵyndary úshin, jalpy baspanasyz júrgen adamdar úshin úlken kómek.
Jambyl oblysynyń ákimi Berdibek Saparbaev ta aýdan ákimderine bul bastamany qoldaıtynyn aıta kelip, aýyldy jerlerdegi az qamtylǵan, áleýmettik jaǵdaıy tómen otbasylarǵa asarlatyp úı salyp berý týraly usynysyn aıtqan bolatyn. Oblysta búginde 377 eldimeken bar bolsa, sol aýyldarda barlyǵy 300 úı salynady dep kútilýde. Tipti qazirgi kezde asar Baızaq aýdanynyń Mádimar aýylynda bastalyp ta ketti. Atalǵan aýyldyq okrýg ákiminiń sheshimimen 15 sottyq jer telimi bólinip, 4 bala tárbıelep otyrǵan jalǵyzbasty ana Ǵalııa Qurmanovaǵa 4 bólmeli úı salynýda. Aýyl turǵyny J.Dáýletov óziniń eski úıin buzǵan kezde shyqqan qurylys materıaldaryn tegin beripti. Budan bólek, qazirgi kezde kúrdeli jóndeý jumystary júrgizilip jatqan Sh.Ýálıhanov atyndaǵy orta mektepten shyqqan jaramdy qurylys materıaldary da qajetke paıdalanylýda. Sonymen qatar, aýyldyń árbir azamaty jaǵdaıynyń kelgeninshe qarjylaı kómek kórsetýde. Al, aýdan aýmaǵyndaǵy 18 aýyldyq okrýgte 2020-2021 jyldar aralyǵynda baspanaǵa muqtaj 18 otbasy turǵyn úımen qamtylady. Endi bul bastama oblys kóleminde qoldaý taýyp, aýyldyń azamattary birlesip baspanaǵa muqtaj jandarǵa úı salyp beretin bolady.
Jambyl oblysy