Keshe Prezıdent janyndaǵy Ortalyq kommýnıkasııalar qyzmeti uıymdastyrýymen baspasóz máslıhaty ótkizildi. Ol Astanadaǵy Reseı ǵylym jáne mádenı ortalyǵynda «Hakasııa jáne Altaı jartas óneri» atty kórmeniń ashylýyna arnaldy.
Keshe Prezıdent janyndaǵy Ortalyq kommýnıkasııalar qyzmeti uıymdastyrýymen baspasóz máslıhaty ótkizildi. Ol Astanadaǵy Reseı ǵylym jáne mádenı ortalyǵynda «Hakasııa jáne Altaı jartas óneri» atty kórmeniń ashylýyna arnaldy.
Qazirgi zamanǵy ónerdiń «Shejire» galereıasy uıymdastyrǵan biregeı kórme Reseıdiń Hakasııa men Altaı respýblıkalarynan tabylǵan petroglıfterdi tanystyrýdy alǵa maqsat etip qoıǵan. Onda kóne qytaı tásili boıynsha estampajdyq ádispen qaǵazǵa túsirilgen 70-ten astam kóshirme kópshilik nazaryna usynylady.
Baspasóz máslıhatyna QR eńbek sińirgen óner qaıratkeri, «Shejire» galereıasynyń dırektory Roza Júsipova, tarıh ǵylymdarynyń doktory, professor, Qazaqstandaǵy Reseı áriptestigi ókildiginiń jetekshisi Vıktor Shýlıka, fızıka-matematıka ǵylymdarynyń doktory, mádenıet jáne tarıhtanýshy Sergeı Narylkov, Altaı memlekettik tehnıkalyq ýnıversıteti sáýlet óneri men dızaın kafedrasynyń dosenti, Altaı, Mońǵolııa men Qıyr Shyǵys petroglıfterin zertteýshi Elena Nazarenko, jańa geoarheologııa zerthanasynyń ǵylymı qyzmetkeri, Ál-Farabı atyndaǵy QazUÝ tarıh, arheologııa jáne etnografııa fakýltetiniń qyzmetkeri, Italııanyń ǵalymy Sala Renato, tarıh ǵylymdarynyń doktory, Álkeı Marǵulan atyndaǵy arheologııa ınstıtýtynyń professory, «Qazaqstan petroglıfteri» kitabynyń avtory Zeınolla Samashev pen fılologııa ǵylymdarynyń doktory, professor, túrkitanýshy, altaıtaný men túrkitaný ǵylymı-zertteý ortalyǵynyń dırektory Qarjaýbaı Sartqojauly qatysyp, buqaralyq aqparat quraldary ókilderiniń suraqtaryna jaýap berdi. Olar óz sózderinde jalpy jartas óneriniń mán-maǵynasyn, qundylyǵyn aıtyp túsindirip, Hakasııa men Altaı petroglıfteriniń mazmuny men mánine keńinen toqtalyp ótti.
Qazaqstanda tuńǵysh ret ótkizilip otyrǵan bul kórmeniń biregeı toptamasyna kóne jartas óneriniń anaǵurlym alyp eskertkishteri – Sedlovına, Tepseı, Sýhanıha, Oglahty, Shalabolın jáne Boıar taýlary petroglıfteri – Úlken jáne Kishi jazba, oba tastary jáne okýn men saq dáýirleri músinderiniń estamp kóshirmeleri kiredi.
Hakasııa men Altaı muralarynyń birtutas kórinisi – kóne kórkemóner. Bul jartastaǵy sýretter erekshe oryndalý úlgisimen tánti etip, berilgen beıneler jumbaǵymen arbap, tańbalar men kompozısııa belgileri, sondaı-aq, túrki rýna jazbalary kez kelgen adamdy tańǵaldyrary sózsiz.
«Shejire» galereıasynyń dırektory Roza Júsipova sóziniń sońynda astanalyqtar men qala qonaqtaryn 30 qazanǵa deıin jalǵasatyn jartasqa jazý ónerine negizdelgen Hakasııa men Altaı petroglıfterine arnalǵan kórmemen tanysýǵa shaqyrdy.
Aıdar О́RISBAEV,
«Egemen Qazaqstan».
ASTANA.