Búgin, 10 qazan kúni Qazaqstan Prezıdenti Nursultan Nazarbaev Ázerbaıjan Respýblıkasynyń Prezıdenti laýazymyna qaıta saılanýyna oraı Ilham Álıevke quttyqtaý jedelhatyn joldady. Bul týraly Aqordanyń baspasóz qyzmeti habarlady.
Jedelhatta Nursultan Nazarbaev Ilham Álıevtiń el Prezıdenti laýazymyndaǵy qyzmeti Ázerbaıjandy odan ári jan-jaqty damytýǵa jáne gúldendirýge múmkindik beretinine senim bildirgen.
«Dostyq pen ózara qurmet dástúrlerine negizdelgen Qazaqstan men Ázerbaıjan arasyndaǵy strategııalyq seriktestiktiń aıasy aldaǵy ýaqytta da keńeıip, halyqtarymyzdyń ıgiligi jolynda nyǵaıa túsetin bolady», - dep atap ótken Memleket basshysy.
Qazaqstan Prezıdenti sońynda I.Álıevke zor densaýlyq, qyzmetinde jańa bıikter, al baýyrlas ázerbaıjan halqyna beıbitshilik pen baq-bereke tilegen.