Keshe elordada Ulttyq baspasóz klýbynda Qazaqstannyń jas kásipkerleri qaýymdastyǵynyń «Shabyt» jobasy aıasynda tuńǵysh ret qazaq tiline aýdarylǵan álemge áıgili jazýshy-trenerler Napoleon Hılldiń «Oılan jáne baıy» jáne Bodo Sheferdiń «Qarjylyq táýelsizdikke jol» atty kitaptarynyń tusaýkeseri ótti. Oǵan «Atameken» odaǵy» ulttyq ekonomıkalyq palatasy» tóraǵasynyń birinshi orynbasary Rahym Oshaqbaev, Qazaqstannyń jas kásipkerleri qaýymdastyǵynyń tóraǵasy Maqsat Qojambek qatysyp, atalǵan kitaptar jaıynda BAQ ókilderi suraqtaryna jaýap berdi.
Keshe elordada Ulttyq baspasóz klýbynda Qazaqstannyń jas kásipkerleri qaýymdastyǵynyń «Shabyt» jobasy aıasynda tuńǵysh ret qazaq tiline aýdarylǵan álemge áıgili jazýshy-trenerler Napoleon Hılldiń «Oılan jáne baıy» jáne Bodo Sheferdiń «Qarjylyq táýelsizdikke jol» atty kitaptarynyń tusaýkeseri ótti. Oǵan «Atameken» odaǵy» ulttyq ekonomıkalyq palatasy» tóraǵasynyń birinshi orynbasary Rahym Oshaqbaev, Qazaqstannyń jas kásipkerleri qaýymdastyǵynyń tóraǵasy Maqsat Qojambek qatysyp, atalǵan kitaptar jaıynda BAQ ókilderi suraqtaryna jaýap berdi.
«Qazaqstannyń jas kásipkerleri qaýymdastyǵy jastardy tabystylyq jolyna bastaıtyn álemdik deńgeıdegi kitaptardy qazaq tiline aýdarý arqyly jastardyń kásipkerlikke degen qyzyǵýshylyǵyn arttyrý maqsatynda «Shabyt» jobasyn bastaǵan-dy. Onyń alǵashqy bastamasy retinde Napoleon Hılldiń «Oılan jáne baıy» kitaby men Bodo Sheferdiń «Qarjylyq táýelsizdikke jol» atty tanymal eńbekteri túpnusqadan qazaq tiline aýdarylyp, qoldaryńyzǵa tıip otyr. Bul kitapta N.Hıll oqyrmandaryna jetistik qupııasyn ashyp, is-áreketter josparyn usynady. Kitaptyń basty qundylyǵy qansha ýaqyt ótse de óziniń ózektiligin joımaı, qazirgi qoǵamda da tabysqa jetýge bastaıtyn nusqaýshylardyń biri bolyp qalýynda jatyr. Kitap jastarǵa tabysqa jetý úshin ne isteý kerektigin ǵana emes, oǵan qalaı jetýge bolatyndyǵyn da úıretedi. Al B.Shefer óz kitabynda qalyń oqyrmanǵa kásip qurý men qolda bardy saqtaýdyń, sonymen birge, tabysty eselep ósirýdiń qupııalaryn ashady, deıdi Qazaqstannyń jas kásipkerleri qaýymdastyǵynyń tóraǵasy Maqsat Qojambek. Sondaı-aq, ol BAQ ókilderine osyndaı ıgi bastamalardy nasıhattaýda birige jumys jasaýdy usyna kele, mundaı sharalar qaýymdastyq tarapynan, buıyrtsa, áli de óz jalǵasyn taba beretindigin jetkizdi.
Endigi tańda joǵaryda atalǵan qos kitapty Qazaqstannyń jas kásipkerleri qaýymdastyǵy joǵary oqý oryndary men aýyl kitaphanalaryna, sonymen qatar, jas kásipkerlerge taratýdy josparlap otyr.
Ábdirahman QYDYRBEK,
«Egemen Qazaqstan».