Keshe «Nur Otan» HDP-nyń Ortalyq keńsesinde partııa Doktrınasy jobasyn daıyndaý jónindegi jumys tobynyń qorytyndy otyrysy bolyp ótti.
Keshe «Nur Otan» HDP-nyń Ortalyq keńsesinde partııa Doktrınasy jobasyn daıyndaý jónindegi jumys tobynyń qorytyndy otyrysy bolyp ótti.
Ony partııa Tóraǵasynyń birinshi orynbasary Baýyrjan Baıbek ashyp, júrgizip otyrdy. Otyrysqa jumys tobynyń músheleri, Parlament Májilisiniń depýtattary, ortalyq jáne jergilikti memlekettik organ basshylary, zııaly qaýym ókilderi, ǵalymdar men sarapshylar qatysty. Májilis barysynda aımaqtarda ótken talqylaýlardan keıin kelip túsken usynystardy eskere otyryp, Doktrına jobasynyń túzetilgen nusqasy talqylandy.
Doktrına boıynsha kelip túsken barlyq usynystar negizgi bes baǵyt boıynsha toptastyryldy: jastarmen jumysty kúsheıtý, memlekettik tildi damytý, Jalpyǵa Ortaq Eńbek Qoǵamyn qurý, aımaqtardy damytý, qoǵamdyq baqylaý men azamattyq bastama.
Májilis barysynda B.Baıbek partııanyń Tuǵyrnama, Baǵdarlama jáne Doktrına sııaqty negizgi úsh qujaty bolatynyn aıtty. Tuǵyrnama – partııanyń bir saılaý merzimine arnalǵan qysqa basymdyqtary aıqyndalǵan negizgi qujat.
Baǵdarlamada partııanyń jańa basymdyqtary jazylyp, ol uzaq merzimge baǵyttalady. Al Doktrınada partııanyń maqsat-muraty men qundylyqtary aldaǵy birneshe onjyldyqtarǵa arnalyp jazylady, dedi B.Baıbek.
Eske sala ketetin bolsaq, Doktrına Elbasy, partııanyń Kóshbasshysy N.Nazarbaevtyń tapsyrmasy boıynsha ázirlendi. Qujatty daıyndaý kezinde jetekshi sheteldik partııalardyń uqsas partııalyq qujattarynyń úlgileri qoldanyldy. Osyǵan deıin bolǵan jumys tobynyń úsh májilisinde de Doktrına jobasy talqylanǵan bolatyn. Doktrına daıyndaýdyń sońǵy kezeńinde onyń qazaq tildi mátinin jetildirý úshin arnaıy redaksııalyq top quryldy. Saýytbek Abdrahmanov jetekshilik etetin ol toptyń quramyna Jabal Erǵalıev, Aldan Smaıyl, Amangeldi Myrzabek, Namazaly Omashev syndy zııaly qaýym ókilderi kirdi.
Doktrına jobasynda alǵash ret ıdeıalyq-dúnıetanymdyq kózqarastar men qundylyqtar naqty bekitilgen. Iаǵnı, qujat jobasynda partııanyń mıssııasy, onyń qundylyqtary, memleket pen azamat arasyndaǵy ózara árekettestiktiń jańa ustanymdary, tabystyń 7 faktory – birlik pen kelisim, tól mádenıet pen ımandylyq, kúshti ekonomıka, ádiletti áleýmettik saıasat, zııatkerlik ult, álemge ashyq Qazaqstan men tıimdi memlekettik basqarý aıqyndalǵan. Doktrına – partııa rólin aıqyndaıtyn negizgi qujat. Doktrına jobasy «Nur Otan» partııasynyń XV sezinde delegattardyń talqylaýyna usynylady.
Jaqsybaı SAMRAT,
«Egemen Qazaqstan».