Basty qundylyq – adam ómiri

Árıne, búgingi tańda den­saýlyq saqtaý salasyna, basqa da salalardyń jumysyna qatysty aıtylyp jatqan synı pikirler az emes. Desek te, kinániń bárin solarǵa aýdarý qanshalyqty ádiletti?!

Aıtalyq, ózim turatyn úıdiń mańynda dámhanalarda betperdesiz, saqtyq sharalaryn saqtamaı otyrǵan jastardy jıi kóremin. Kóshede dál solaı jaıbaraqat serýendep júrgender az emes. Kún saıyn jan-jaqtan aýrýǵa shaldyqqan, ómirimen qoshtasqan adamdar týraly jamanat habarlar jetip jatqanda bulaı jaıbaraqat júrýge bolmaıdy.

Meniń tanystarymnyń arasynda da aýyryp jatqandar, qaıtys bolǵandar bar. Tanys kásipkerdiń jumysyndaǵy 100 adamnyń qyryqtan astamy aýrý juqtyrdy. Bir fermerdiń qol astyndaǵy 160 jumysshynyń júzden astamy em qabyldaýda. Keı adamdar aýrýdy qatty qı­nalmaı, óz kúshimen jeńip jatyr. Endi bireýler birneshe kúnniń ishinde aýyr jaǵdaıǵa ushyraýda. Áleýmettik jelide qaraly habar jetkizgen, bir-birine kóńil aıtqan, den­saýlyǵyn surasqan jazbalardan kóz súrinedi. Mundaı jaǵdaıda karantın sharalaryn kúsheıtý týraly sheshim árıne, oryndy boldy. Aldaǵy ýaqytta karantın merzimin uzartý da artyq bolmaıdy.

Memleket úshin eń bas­ty qundylyq – adamdardyń ómiri men densaýlyǵy. Ekonomıkalyq qıyndyqtyń ornyn ýaqyt óte kele toltyramyz, al adamdardyń ómiri men densaýlyǵyn eshqashan qaıtara almaımyz. Sol sebepti barsha jurtty memleket tarapynan qabyldanǵan qatań karantın rejimine túsinistikpen qaraýǵa, qoldaýǵa jáne tár­tip saqtaýǵa shaqyramyn. Ár azamat óz densaýlyǵy úshin birinshi kezekte ózi jaýap­ty. Atalarymyz «Birinshi baı­lyq – densaýlyq» dep tegin aıt­paǵan, sol qanatty sóz qazirgi tańda óte ózekti.

Tóleýtaı RAHYMBEKOV,

«Ulttyq agrarlyq ǵylymı-bilim berý ortalyǵy» KeAQ basqarma tóraǵasy