Májilistiń sońǵy otyrysyndaǵy sońǵy suraq keıbir zańnamalyq aktilerge bıýdjet zańnamasyn jetildirý máseleleri boıynsha ózgerister men tolyqtyrýlar engizý týraly zań jobasyn qaraýǵa arnaldy.
Májilistiń sońǵy otyrysyndaǵy sońǵy suraq keıbir zańnamalyq aktilerge bıýdjet zańnamasyn jetildirý máseleleri boıynsha ózgerister men tolyqtyrýlar engizý týraly zań jobasyn qaraýǵa arnaldy.
Baıandama jasaǵan Ekonomıka jáne bıýdjettik josparlaý mınıstri Erbolat Dosaev bul zańnyń qajettiligi týraly segiz túrli sebep aıtty. Birinshiden, dedi ol, turaqty sıpattaǵy transfertterdiń jergilikti bıýdjet shyǵystarynyń bazasyna berilýine baılanysty keıbir is-sharalardy qarjylandyrýdyń eń tómengi shegin belgileý usynylady. Bul endi jergilikti bıýdjetti basqarýshylarǵa keıbir asa qajetti jergilikti shyǵystarǵa nemquraıdy qarap, oǵan bólinetin somany tym azaıtyp tastaýynan saqtaıtyn qajetti norma ekeni daýsyz.
Ekinshi sebebi, bıýdjettik suranymdardy daıyndaý kezinde baǵdarlamalar men jańa bastamalar shyǵystaryna lımıtter engizilip, qarjylyq tártipti arttyrý kózdelip otyr delindi. Bul másele durys-aq der edik, biraq sony syltaýratyp jergilikti baǵdarlamalar ákimshileriniń qajetti shyǵystardy kesýine jaǵdaı jasalyp, jaqsy bastamalarǵa tusaý salýyna soqtyrýy múmkin. Mınıstrdiń zań jobasynyń qajettiligin aıtqan úshinshi sebebi, bıýdjettik ınvestısııalardy birlesip qarjylandyratyn jaǵdaılarda joǵary turǵan bıýdjetten tómengi bıýdjetke nysanaly damý transfertterin bólý kózdeledi degenge saıady. Kelesi sebebi, bıýdjet qarajatyn ıgerý kezinde bıýdjettik baǵdarlamalardyń nátıjelerine qol jetkizbegeni úshin bıýdjettik baǵdarlamalar ákimshiligi birinshi basshysynyń tártiptik jaýapkershiligin engizý usynylǵany aıtyldy. Árıne, jaýapkershilik degen óte jaqsy, biraq sol bultartpaıtyn negizde bolsa quba-qup bolar edi. Zań jobasyn talqylaý boıynsha sóz alǵan depýtat A.Perýashev bul jerde jaýapkershilikten jaltarýǵa «oryn qaldyrylǵanyn» atap ótti. Atap aıtqanda, basshy qyzmetinen aýysqanda nemese jumystan shyqqan kezindegi jaýapkershilik kimde bolatyndyǵy anyqtalmaǵandyǵyna nazar aýdaryldy.
Zań jobasynda bıýdjettik baǵdarlamalar ákimshileriniń ınvestısııalardyń iske asyrylýyn baqylaý úshin memlekettik organdardyń ishki qadaǵalaý qyzmetterine nysanǵa baryp, tekserý jóninde qosymsha ókilettikter beriledi delingen. Bul da jaýapkershilikti arttyrý baǵytyndaǵy tıimdi qadam bolýǵa tıisti. Sondaı-aq, zań jobasynda memlekettik pen jekemenshiktiń birlesken jobasyn ázirleýge qajetti tetik arnaýly mamandandyrylǵan uıymdar arqyly júrgiziledi delingen.
Zań jobasy týraly baıandama tyńdalǵan soń, birneshe suraqqa jaýap berildi. Al talqylaý boıynsha eki depýtat qana sóz aldy. Onyń birinshisi Tatıana Iаkovleva zań jobasyn tolyq qoldaıtynyn aıtty. Májilistiń jalpy otyrystaryna baryp júrip bir qyzyq dúnıeniń ábden qalyptasqan dástúrge aınalyp bara jatqany týraly aıta ketkimiz keledi. Zań jobasy týraly baıandama aıaqtalǵan soń mindetti túrde birinshi nemese alǵashqylardyń biri bolyp sóılegen bir nemese birneshe depýtat ony birjaqty qoldap shyǵady. Osyǵan qaraǵanda, ótirik bolsa qudaı ózi keshirsin, baıandamashynyń aldyn ala jasaǵan ótinishin oryndaý bar sııaqty...
Zań jobasy týraly birqatar syndy «Aq jol» fraksııasynyń jetekshisi, depýtat A.Perýashev aıtty. Ol «bıýdjettik ınvestısııa» degen sózdiń naqtylyǵyna kúmán keltirdi. Sondaı-aq, joǵaryda aıtqanymyzdaı, bıýdjetti josparlaý basshysynyń jeke jaýapkershiligi týraly aıtylǵan baptyń durystyǵyn synady. Depýtat, sondaı-aq bıýdjettik baǵdarlamanyń oryndalý barysyna shyǵys ákimshiliginiń ózi monıtorıng jasaýyn syn tezine aldy. Mundaı monıtorıngtiń tıimdi ekenine tolyq kúmán keltirýge bolady, dedi ol. Sóziniń qorytyndysynda ol óz fraksııasynyń zań jobasyn qoldamaıtyndyǵyn atap kórsetti. Daýys berý nátıjesinde zań jobasy segiz daýystyń qalys qalýymen birinshi oqylymda maquldandy.
Jaqsybaı SAMRAT,
«Egemen Qazaqstan».