Nur-Sultan qalasynyń polısııa departamentiniń qyzmetkerleri dárilik zattar men medısınalyq quraldardyń zańsyz satylýyn anyqtaý boıynsha jedel-aldyn alý sharalarynyń alǵashqy táýliginde zańsyz aınalymnan medısınalyq maskalar, kombınezondar, termometrler, medısınalyq kózildirikter men antıseptıkterdiń iri partııasyn tárkiledi, dep habarlaıdy elorda ákimdiginiń resmı saıty.
"Tártip saqshylary habarlandyrý saıttary arqyly termometr, ıngavırın, parasetamol, seftrıakson jáne basqa da dári-dármekter satqan ınternet-qoldanýshylardy anyqtady. Tárkilengen dári-dármektiń jalpy somasy 3 mln.700 myń teńgeni qurady" - delingen polısııa departamentiniń habarlamasynda. Sondaı-aq polısııa qyzmetkerleri 63 dana termometr, sondaı-aq jalpy somasy 3 mln. teńge shamasynda medısınalyq plash, maskalardy zańsyz satqan qala turǵynyn anyqtady. Sonymen qatar Túrkistan kóshesinde 200 myń teńge somasynda 100 lıtr antıseptıkti zańsyz satý faktisi anyqtaldy. "Barlyq quqyq buzýshylar polısııaǵa jetkizildi. Árbir anyqtalǵan fakti boıynsha qoldanystaǵy zańnamaǵa sáıkes quqyqtyq baǵa beriletin bolady" - dedi departamentte. Nur-Sultan qalalyq polısııa departamenti turǵyndardyń dári-dármekterdi zańsyz satý faktisi málim bolǵan jaǵdaıda, jaqyn mańdaǵy polısııa bólimshesine júginýdi nemese 102 nómirine qońyraý shalýdy suraıdy.