“Ár adamnyń janynda ashylmaı jatqan keni bar” degen sózdiń ıesi kim ekendigin, sol kisiniń shyǵarmalaryndaǵy rýhanı tazalyq pen adamgershilik sezimin boıyna darytqan oqyrman qaýym jaqsy biledi. Iá, durys aıtasyz. Bul sózdi qazaqtyń kórnekti jazýshysy, Memlekettik syılyqtyń laýreaty, Qazaqstannyń eńbek sińirgen qaıratkeri, “Qurmet” ordeniniń ıegeri, Qazaqstan jazýshylar Odaǵy Astana fılıalynyń jetekshisi Ákim Tarazı aıtqan edi.
Jýyrda, halqymyzdyń abzal azamaty, óz shyǵarmalarymen oqyrman qaýymnyń júreginen oıyp turyp oryn ala bilgen jazýshy oqyrmandarymen taǵy da jaqyndasa túsýge múmkindik aldy. Buǵan Ulttyq kitaphanada ashylǵan “Tarazynyń eki basyn teń ustaıtyn Tarazı” atty kórme muryndyq bolyp otyr. Búgingi tańda qazaq ádebıetindegi shoqtyǵy bıik tulǵalardyń biri bolyp eseptelinetin Ákim Tarazı kórmesine óziniń úzeńgiles zamandastary, ádebıet aıdynyndaǵy serikteri, dos-jarandary, shyǵarmashylyq ortadaǵy baýyrmal aǵa-inileri men jandary jaısań oqyrmandar kóptep keldi.
33 jasynda alǵashqy “Quıryqty juldyz” atty shyǵarmasymen tanylǵan jas jazýshynyń ataǵy kóp uzamaı eren eńbegi men azamattyq rýhynyń arqasynda shartarapqa tanyldy. Munyń aıǵaǵy retinde Ákim Tarazıdiń orys, qytaı, aǵylshyn, venger jáne fın tilderine aýdarylǵan kitaptaryn aıtýǵa bolady.
Halyqtyń zor yqylasyna bólengen jazýshy “Tasjarǵan” romanymen tipti daralana tústi. Abaı atyndaǵy memlekettik pedagogıka ınstıtýtyn, Máskeýdegi joǵary ssenarıster kýrsyn tamamdaǵan Ákim Tarazıdiń Jambyl oblysyndaǵy aýyl mektebinde muǵalim bolyp qyzmet atqarǵanyn bireý bilse, bireý bilmeýi múmkin. Budan keıin qazaq baspasózine kóptegen jyldar eńbek sińirgen eline adal azamat kınematografııa salasyna da eleýli iz qaldyrdy. “Qorqaý juldyz”, “Sher”, “Tyrna, tyrna, tyrnalar”, “Jaza”, “Qııanat”, “Joly bolǵan jigit”, “Mahabbat jyry” sııaqty romandar men povesterdiń avtory bolǵan Á.Tarazıdiń biraz fılmderge ssenarııin jazǵany da ózimizge belgili. Sondaı-aq, Ákim aǵanyń eńbegi sińgen “Mustafa Shoqaı”, “Arman-ataman”, “Tulpardyń izi” syndy kınofılmderin de kórermen qashanda súıip tamashalaıdy. Bunyń syry – talanttyń naǵyz eńbekqorlyǵynda, adal eńbeginde, oqyrmanǵa degen shynaıy mahabbatynda jatsa kerek.
– Jarty ǵasyr boıy halqyn shyǵarmashylyǵymen sýsyndatqan Ákim aǵanyń kitap kórmesiniń tusaýyn keskeli otyrmyz. Jazýshynyń shyǵarmashylyq óresin ózderińiz de jaqsy bilesizder. Qazaq ádebıetine qanshama romandar, povester, áńgimeler, dramatýrgııalyq týyndylar, kınossenarııler berdi. Ýaqyt almassa da, qoǵam almassa da qazaq ádebıetiniń mol qazynasyn únemi tolyqtyrýdy kózdedi. Endi jazýshynyń eńbekterin qala stýdentteri, joǵary jáne orta bilim berý mekemeleriniń muǵalimderi, oqýshylar kórip, tanysa alady. Budan buryn Ábish aǵamyz ben Farıza apamyzdyń mereıtoıyna arnalǵan bir aılyq kórmemiz ótip edi, búgingi kórmeni de osyndaı taǵylymy mol dástúrmen jalǵastyrǵaly otyrmyz”, – dedi Ulttyq kitaphananyń bas dırektory Rahymjan Otarbaev kórmeniń ashylý saltanatynda. Rásim kezinde О́.Baıgeldı, M.Joldasbekov, F.Ońǵarsynova, T.Ábdik, S.Abdrahmanov sóz sóılep, qalamger qadiri jóninde óz oılaryn ortaǵa saldy.
Kórmege jazýshynyń kitaptary, gazetter men jýrnaldardaǵy Ákim aǵa jónindegi jarııalanymdar, jazýshynyń jeke muraǵatynan alynǵan fotosýretter men kóptegen qujattar qoıylǵan. Oqyrmannyń rýhanı jan-dúnıesin baıytatyn bul kórme bir aıǵa deıin jalǵasady.
Araı ÚIRENIShBEKQYZY.