Indettiń tez taralýyn tejeý úshin karantın rejimi engizilip, onyń qatań saqtalýyn arnaıy monıtorıgtik top baqylaýyna aldy. О́ńir-óńirde belsendi jumys istep jatqan arnaıy top sanıtarlyq normalardyń buzylǵany týraly birqatar fakti tirkedi.
Ortalyq kommýnıkasııalar qyzmeti alańynda Densaýlyq saqtaý mınıstrligi Taýarlar men kórsetiletin qyzmetterdiń sapasy men qaýipsizdigin baqylaý komıtetiniń tóraǵasy Tımýr Sultanǵazıev karantın rejimin saqtamaǵan jaǵdaılar kezdesip jatqanyn naqty dáleldermen atap ótti.
Onyń aıtýynsha, 6-14 shilde aralyǵynda monıtorıng toptary 16 572 nysandy tekserip, onyń 1 617-sinde sanıtarlyq normalardyń buzylǵany anyqtaldy. Keleńsiz jaǵdaı retke kelgenshe 564 nysan óz erkimen qyzmetin toqtatty. Ákimshilik buzýshylyq týraly 225 hattama jasalyp, aıyppul salyndy.
Saýda jáne qoǵamdyq tamaqtaný oryndarynda anyqtalǵan negizgi buzýshylyqtar – halyqtyń maska taqpaýy, áleýmettik araqashyqtyq belgilerdiń bolmaýy, dene qyzýynyń ólshenbeýi, aýany tazartpaý, aýmaqty zararsyzdandyrmaý. Sondaı jaǵdaı Qostanaı oblysynda tirkelgen, sondaǵy bir nysanda qyzmetkerler maska, qolǵap, antıseptık qoldanbaǵan.
Aqmola oblysynda jumys isteýine tyıym salynǵan, aýmaǵy 500 sharshy metrden asatyn dúken jabylmaǵan. Oǵan 638 940 teńge aıyppul salyndy. Semeıde «Álem» saýda úıi men «Voshod» bazaryna da karantın rejiminde jumys istegeni úshin tıisti aıyppuldar salyndy.
Karantınge qaramastan toı-jıyndar da jasalyp jatyr. Almatyda 30 adamǵa arnalǵan banket pen 100 qonaqqa úılený toıyn jasaǵany úshin eki mekemeniń ıeleri ákimshilik jaýapkershilikke tartyldy.
Jalpy mundaı saqtyq sharalarynyń buzylýy elimizdiń barlyq óńirinde anyqtalǵan.
«Sondaı-aq monıtorıng toptaryna dári-dármektiń shekti baǵasy men onyń zańsyz satylýyn qadaǵalaý mindeti júktelgen edi. Aımaqtardan kelip túsken málimetke sáıkes, 1 400-den asa dárihana uıymyna monıtorıng jasalǵan. Jalpy mundaı uıymdardyń sany – 8 myń. Aımaqtarda qajetti dári-dármekti qymbat baǵamen satý jaǵdaıy áli de tirkelip jatyr. Buǵan qosa jalpy quny 110 mln teńgelik tirkelmegen dári-dármektiń 200 túriniń satylyp jatqany anyqtaldy. Osy jaǵdaılar boıynsha Taýarlar men kórsetiletin qyzmetterdiń sapasy men qaýipsizdigin baqylaý komıtetine qarasty óńirlik departamentterde 65 ákimshilik materıal bar. Qazirgi tańda jalpy somasy 972 myń teńge bolatyn 12 ákimshilik aıyppul salyndy. Qazaqstanda dári-dármektiń 6 478 túri shekti baǵamen satylady. Dári-dármektiń qymbatqa satylyp jatqanyn kórgen azamattar bizdiń komıtettiń aýmaqtyq departamentterine habar bere alady. Baılanys quraldary komıtettiń saıtynda bar. Mundaı jaǵdaı boıynsha elektrondy úkimet portaly nemese Dari.kz mobıldik qosymshasy arqyly júginýge bolady», dedi Tımýr Sultanǵazıev.
Qazirgi ýaqytta aýyr jaǵdaıda jansaqtaý men anestezıologııa bóliminde emdelip jatqandardyń sany – 306 adam. Aýyr jaǵdaıda 265 syrqat, óte aýyr jaǵdaıdaǵy 41 naýqas bar. О́kpeni jasandy jeldetý apparatyna qosylǵan 67 naýqas em qabyldaýda. Invazıvti emes ókpeni jasandy jeldetý apparatynda 133 syrqat jatyr. О́zinshe demalatyn oksıgenoterapııa alyp jatqan syrqattardyń sany – 106. О́z betinshe demalatyn naýqastardyń sany – 9265 naýqas.
«Osy jyldyń naýryz aıynan beri Qytaıdan jalpy somasy 3 mlrd teńgege 696 myń test-júıesi satyp alyndy. Búginge deıin Qazaqstan aýmaǵynda 1 mln 700 myń zertteý (PTR-test) júrgizildi. Onyń 971 myń zertteýi Ulttyq saraptama ortalyǵynda jasaldy. Qalǵan testter jeke medısınalyq uıymdar men medısınalyq uıymdardyń zerthanalarynda alyndy. Ulttyq saraptama ortalyǵynyń barlyq fılıalynda otandyq taýar óndirýshilerdiń test-júıesin qoldaný kózdelýde. Úkimettiń rezervi aıasynda 1,2 mln zertteý júrgizý úshin test-júıelerin satyp alý josparlanǵan. Otandyq bolsyn, sheteldik bolsyn test-júıelerine qoıylatyn tehnıkalyq talaptar bar. Osy talaptarǵa barynsha sáıkes keletin test-júıeleri ǵana satyp alynady», dedi Tımýr Sultanǵazıev.