Abaısha aıtqanda, «shen taǵyp, shekpen kııýdi» maqsat etpegen bir azamat bolsa, ol osy biz sóz etkeli otyrǵan kerekýlik belgili sazger Qaıyrbek Satıev aǵamyz bolar... Bala shaǵynan óner dese ishken asyn jerge qoıyp, jastardy mýzyka nárimen sýsyndatyp, ustazdyq jolynda da óshpes iz qaldyrdy ol.
«Jazmyshtan ozmysh joq», Qaıyrbek aǵa ótken jyldyń shilińgir shildesinde kelmestiń kemesine minip kete bardy. Al onyń artynda Ertistiń Pavlodar ólkesin jan-tánimen súıip ánge qosqan ólmes murasy qaldy...
Shyǵys Qazaqstan ýnıversıtetiniń mýzyka fakýltetiniń túlegi, 1994 jyly uıymdastyrylǵan oblystyq kompozıtorlar odaǵynyń laýreaty, 2000 jyly «Jyl kompozıtory» atanǵan, uzaq jyldar Pavlodardaǵy B.Ahmetov atyndaǵy pedagogıkalyq kolledjdiń aǵa oqytýshysy bolǵan kompozıtor Qaıyrbek Satıevtiń esimi kópshilikke jaqsy tanys edi.
«Aq qaıyń», «Shańyraq», «Pavlodarym», «Áke tilegi», «Ustazyma», «Bóbegim», «Na Irtyshe», «V mıre lıýbvı», «Aqmaral», «Jaýqazyn», «Stýdent» sekildi ondaǵan án jazyp, ásirese sońǵy úsh áni respýblıkalyq túrli óner sharalarynda jıi shyrqalǵan talantty kompozıtordyń sońynda tamasha ánderi men «Ánim ánge jalǵassyn» atty ánder jınaǵy, sonan soń, árıne, ózi óner álemine shyńdaǵan shákirtteri qaldy.
Qaıyrbek Muftanuly 1948 jyly Novosibir qalasynda dúnıege keldi. Qazaqtyń basyna náýbet bolyp tóngen ótken ǵasyrdyń otyzynshy jyldaryndaǵy aýyrtpalyq Qalıasqar áýletine de ońaı tımegen, asharshylyqta Reseıge aýyp ketken. Keıin biraz jyldar ótip, el baýyryn kótere bastaǵan tusta bul áýlet Maı aýdanynyń Aqshıman aýylyna kóship kelgen eken. Qaıyrbek Muftanuly aýylda orta mektep bolmaýy sebepti joǵary synypty aýdan ortalyǵy Kóktóbedegi ınternatta oqyp bitirdi. Oqýshy kezinen syrnaıda oınap, kórkemónerpazdar úıirmesine qatysty. Sonaý jyldardaǵy oblystyq telearnada uıymdastyrylatyn «Maıra» atty el ishindegi talanttardy tanytqan baǵdarlama el esinde bolar. Osy baǵdarlama kóktóbelik talantty jas býyndy tanytty, olardyń qatarynda syrnaıshy, ánshi Qaıyrbek Satıev te bar edi.
Qaıyrbek aǵa kózi tirisinde oblystyq «Saryarqa samaly» gazetiniń shyǵarmashylyq ujymymen tyǵyz qarym-qatynasta boldy. Eki myńynshy jyldardyń basynda osy basylymda eńbek etken jýrnalıst Qaırat Ábildanyń (qazir respýblıkalyq «Egemen Qazaqstan» gazetiniń qyzmetkeri – avt.) sózine jazǵan «Aq qaıyń», «Pavlodarym» atty ánderi kópshiliktiń kóńilinen shyqqan edi. Odan beride talantty kompozıtor «Saryarqa samaly» gazetiniń 90 jyldyq mereıtoıyna án jazyp, tartý etti.
«Álem án salyp turady, ol – tylsym qudiretiniń sazy. Ony tyńdap, uǵyný úshin sana men sezim kerek. Dúnıe, ómir, tirshilik – úsheýi bir uǵym. Úsheýi de ánnen quralǵan. Aspanǵa qara, tyńda, kúmbir kúı jetedi, jeldi tyńda, sybyr-kúbir... Men keıde jol júrip kele jatyp, saıyn dalanyń dybysyn tyńdaǵandy unatamyn. Sondaıda qulaǵyma áldebir áýen keledi. О́mir – áýen, tylsymnyń áni – qudirettiń kúshi osy ǵoı dep oılaımyn», degen edi bir suhbatynda Qaıyrbek aǵa tolǵanyp otyryp. Ras, sazger aǵanyń óz ortasynda da, shákirtteri, qalyń kópshilik arasynda da bedeldi, syıly, qurmeti bólek azamat edi.
О́nerge, bilim salasyna qyzmet etip, shen-shekpenge umtylmaı, ádildikti tý etip kótergen, ómir boıy júregi án dep soqqan Qaırekeńdeı – Qaıyrbek Satıevteı óner qaıratkeriniń jarqyn beınesi umytylmaıdy dep senemiz.
Saıa MOLDAIYP,
Qazaqstan Respýblıkasy aqparat salasynyń úzdigi
PAVLODAR