2020 jylǵy qańtar-maýsym aralyǵynda jalpy somasy 113,6 mlrd teńgege 389,1 myń otbasy kópbalaly otbasylarǵa arnalǵan memlekettik járdemaqymen qamtyldy. Maýsym aıynda osy járdemaqy túrin jalpy somasy 19,7 mlrd teńgege 398,091 myń otbasy aldy, dep habarlaıdy Egemen.kz
Atalǵan memlekettik járdemaqyǵa 4 jáne odan kóp birge turatyn kámeletke tolmaǵan nemese kúndizgi bólimde oqıtyn 23 jasqa deıingi stýdent balalary bar otbasylar tabysyna qaramastan úmitker bola alady. Tólem mólsheri balalardyń sanyna baılanysty 42,5 myń teńgeden (4 bala) 74,4 myń teńgege (7 jáne odan da kóp bala) deıin, 8 jáne odan keıingi ár balaǵa 4 AEK-ten saralanǵan.
Osylaısha, osy járdemaqynyń ulǵaıýy 8 jáne odan da kóp balasy bar otbasylar úshin jeke mólsherdi belgileý arqyly qamtamasyz etildi. Tıisti zańǵa Memleket basshysy aǵymdaǵy jylǵy 13 mamyrda qol qoıdy.
8 balasy bar otbasy úshin járdemaqy 88 896 teńgeni quraıdy, 9 balaǵa – 100 008 teńge, 10 – 111 120 teńge, 11 - 122 232 teńge, 12 – 133 344 teńge, 13 – 144 456 teńge, 14 – 155 568 teńge, 15 –166 680 teńge, 16 balaǵa 177 792 teńge tólenedi.
Zań 2020 jyldyń 1 qańtarynan bastap kúshine endi, osyǵan baılanysty 8 jáne odan kóp balasy bar kópbalaly otbasylarǵa beriletin járdemaqy mólsheri taǵaıyndalǵan kezden bastap qaıta esepteldi. Osylaısha, tólenbegen soma osy jyldyń shilde aıynda aýdaryldy.
Jalpy, 2020 jyly kópbalaly otbasylarǵa memlekettik járdemaqy tóleýge respýblıkalyq bıýdjetten 191,1 mlrd teńge qarastyrylǵan
Eske sala keteıik, Qazaqstandaǵy kópbalaly otbasylarǵa olardyń kiristerin esepke almaı beriletin jańa memlekettik járdemaqy 2020 jyldyń 1 qańtarynan bastap ataýly áleýmettik kómek kórsetýdiń jańa tetikterinde qarastyrylǵan tabysy az jáne kópbalaly otbasylardy qoldaýdyń úsh negizgi baǵyty aıasynda engizildi.