Kózden ketse de, kóńilden ketpeıtin erek tulǵalar bolady. Sondaı abzal azamattardyń biri – Serjan Omarov edi. Jer jahandy jaılaǵan aty jaman indet beleń alyp turǵan tusta ol fánıden baqıǵa attandy. Jany jaısań jigit nebári 47 jyl ǵumyr keshti. Negizi bul esim jankúıerlerge jaqsy tanys. О́zgelerdi aıtpaǵanda, sport salasynyń basy-qasynda júrgen azamattardyń ózderi Serjan Bostanulyn kózi tirisinde-aq kóptegen dúbirli dodalarda daralanǵan beldi balýan, talaı daryndy jastyń tomaǵasyn sypyrǵan bilikti bapker jáne parasat-paıymy mol isker basshy retinde túbegeıli moıyndady.
Serjan Omarov 1973 jyly Almaty oblysy Alakól aýdanynyń ortalyǵy – Úsharal qalasynda dúnıege keldi. Ǵasyrlar toǵysynda alaýy tutanǵan Sıdneı Olımpıadasynda qola medaldi ıelengen Aıdyn Smaǵulovtaı dańqty dzıýdoshyny baptaǵan bilikti bapker Baqytbek Mustafınniń qol astynda jattyǵyp, balýandyq ónerdiń qyr-syryna qanyqty. Keıinnen О́skemendegi Shyǵys Qazaqstan memlekettik ýnıversıtetin támamdap, sol jerde Rýslan Seıilhanov, Rústem Smaǵulov, Asqar Mojanov, Erjan Omarbaev, Erlan Shederbaev syndy álemdik deńgeıdegi jarystarda jasyndaı jarqyraǵan sańlaqtarmen bir zalda jattyqty. Alashtyń maqtan tutar azamaty Aıdyn Smaǵulovpen úsh jyl boıy jataqhananyń bir bólmesinde turyp, ýaqyt oza Olımpıadada atoı salǵan balýanǵa aǵalyq qamqorlyq kórsetti.
Serjannyń sportshy retinde de baǵyndyrǵan belesteri az emes. Ol sambo kúresinen respýblıkalyq jarystarda oza shapty, kóptegen týrnırlerde top jardy. 1993 jyly Kstovoda ótken jastar arasyndaǵy álem birinshiliginiń qola medalin moınynda jarqyratty. Qazaq kúresinen uıymdastyrylǵan birqatar iri jarystardyń túıe balýany atanyp, «temir tulpardy» da tizgindedi.
Úlken sporttan qol úzgennen keıin keıipkerimiz túrli kásiptiń tutqasyn ustady. Alaıda boz kilemnen alystaǵan joq. Jańa ǵasyr tabaldyryqtan attaǵan tusta óziniń jeke jobalaryn bastap, Almaty men Úsharaldyń arasyn kezip júrgen kezinde «Jersý» dep atalatyn irgeli korporasııanyń basshysy Baýyrjan Ospanov óziniń týǵan jeri – Alakól aýdanynyń Jylandy aýylynda kúres úıirmesin ashyp, bapker bolýǵa Serjanǵa qolqa saldy. Árıne belgili kásipkerdiń bul balýanǵa kóńili túsýi de beker emes edi. Serjannyń balýan retinde baǵyndyrǵan belesterimen qatar, onyń azamattyq qasıeti, eńbekqorlyǵy, isine tııanaqtylyǵy, sózine beriktigi jaıynda ol da estigen bolar. Bıznesmen Ospanov bapker Omarovqa: «Mindetti túrde Olımpıada chempıonyn tárbıeleýge tıissiń dep men saǵan talap qoımaımyn. Bizdiki tek jastar aýylda sendelip bos júrmesin, jat qylyqtardan aýlaq bolsyn, salamatty ómir saltyn ustansyn degen nıet qana. Olar sport arqyly shynyǵyp, shymyr bolyp ósse de rızamyn. Al eger áldebireýler óz qatarynyń aldy bolyp, dara talantymen oqshaýlanyp jatsa, onda biz de qarap qalmaımyz. Barynsha kómek kórsetýge ázirmiz», dedi.
Bızneste baǵy janǵan azamat qol ushyn beremin dep qulshynyp tursa, tartynatyn nesi bar. Serjan kelisimin berdi de, iske bilek sybana kiristi. О́zi armandaǵan Almatyny, kindik qany tamǵan jeri – Alakóldi tastap, bala-shaǵasyn ertti de, Jońǵar Alataýy bókterindegi Jylandyǵa bir-aq tartty. Kelgen bette B.Ospanov sol aýyldan úı áperdi, aldyna azyn-aýlaq mal salyp berdi. Jattyǵýǵa qajetti qural-jabdyqtarmen qamtamasyz etip, alańsyz daıarlanýlaryna jaǵdaı jasady. Sportshylardyń oqý-jattyǵý jıyndarynan qalmaı, shet jerlerde ótetin týrnırlerge, respýblıkalyq jarystarǵa shákirtterin aparýǵa qajetti shyǵyndy Bákeń óz moınyna aldy. Al bapkerge tek erinbeı eńbek etip, shákirtteriniń sheberlikterin shyńdaý ǵana qaldy. Ondaı qara jumystan S.Omarovtyń tartynbaıtyny anyq.
Sodan beri talaı jyldyń júzi boldy. Jylandynyń jastary salaýattylyqqa kóptep bet burdy. Kúres zalyn jaǵalaǵandardyń qarasy mol. Al buqaralyq bar jerde, nátıjeniń de bolatyny zańdy ǵoı. Birte-birte Omarov baptaǵan órenderdiń aldy halyqaralyq jarystarda oza shaba bastady. Eń tańdaýly shákirti – Araı Qalıjanova 2005 jyly sambodan jasóspirimder arasynda Grekııada ótken álem birinshiliginde qola medaldi enshiledi. Aqmaral Shyńǵyshanova – belbeýli kúresten 2006 jyly áıelder arasynda uıymdastyrylǵan Qazaqstannyń tuńǵysh chempıonatynyń jeńimpazy. Móldir Baıahmet eki ret oqýshylar arasynda el chempıony atandy. Maqpal Tileýbaeva, Samat jáne Sanat Kópshikbaevtar – respýblıka birinshiliginiń, halyqaralyq jarystardyń jeńimpazdary. Basqa da bolashaǵynan úmit kúttiretin jas qyrandar Jylandydan kóptep shyqty. Sony baıqaǵan Ospanov myrza da qarap qalǵan joq. Ol óz qarajatyna shaǵyn ǵana aýylda sport keshenin saldy.
2015 jyly dál sol Bákeńniń demeýshiligimen Almaty oblysy Alakól aýdanynyń Lepsi aýylynda sporttaǵy daryndy balalarǵa arnalǵan mamandandyrylǵan mektep-ınternat óz esigin aıqara ashty. Grek-rım kúresi, erkin kúres, dzıýdo, boks, aýyr atletıka, shańǵy jáne taǵy basqa da sport túrleri boıynsha úıirmeler jumys isteı bastady. Sport zaldary zaman talabyna saı qural-jabyqtarmen jabdyqtaldy. Bul iske elimizdiń birqatar óńirinen bilikti bapkerler tartyldy. Bir sózben aıtsaq, respýblıkamyzdyń ár qıyrynan kelgen jas órenderdiń esh alańsyz jattyǵýyna barynsha jaǵdaı jasaldy. Al osy mekemeni basqarý belgili balýan, bilikti bapker Serjan Bostanulyna senip tapsyryldy. Basshy retinde de ol iskerligimen kózge tústi. Bas-aıaǵy tórt jyldan asa ýaqyt aralyǵynda Lepsidegi mektep-ınternattyń oqýshylary respýblıkalyq dodalarda daralanyp, halyqaralyq arenalarda boı kórsetti. Ol az deseńiz, aıtýly azamattyń tikeleı uıtqy bolýymen erkin kúresten Máýlen Mamyrov pen Dáýren Jumaǵazıev, grek-rım kúresinen Nurbaqyt Teńizbaev pen Marǵulan Ásembekov, bokstan Qanat Islam men Jánibek Álimhanuly, dzıýdodan Aıdyn Smaǵulov, Ashat Jıtkeev jáne Azamat Muqanovtyń qurmetine Lepside jyl saıyn dúbirli doda uıymdastyrylyp turdy.
Serjan toqmeıilsýdi jany súımeıtin jigit edi. Árkez «aryq sóılep, semiz shyǵýdy» unatatyn. Maqtanyp, shákirtiniń jeńisterine masattanyp turǵan sátin bir kórmeısiń. Sál kótermelep sóıleseń «Bári Alla taǵalanyń arqasy. Bizdiki – jaı talpyný, tyrmysý ǵoı» dep kishipeıildik tanytatyn. Ol eshýaqytta maqtanbaıdy jáne ózin de maqtaǵandy unatpaıdy. Bolashaqtaǵy josparyn surasań, «buıyrtsa» dep bappen sóılep, sabyrly qalpynan esh aınymaıtyn. О́ıtkeni Serjannyń tabıǵaty sondaı! Al el sportynyń jaı-kúıi jaıynda áńgime qozǵalsa, ony toqtatý qıyn. Keshegisin, búgingisin aıtqanda, aldyna jan salmaıdy. Tek ózi serik etken kúres ónerin ǵana emes, ózge de sport túrlerine qanyq ekenin birden ańǵartady. Qazaq sportynyń tarıhyna kádimgideı qanyq. Ondaı sátterde sabazben sóz talastyrý, teketiresý – beker. Ishteı bolsa da, myqtylyǵyn moıyndaısyń!
О́skemende birge oqyǵan dostary aıtady: Jataqhanada turǵanda Serjandy dúkenge jumsasań, qajetti taǵamǵa bólingen qarajattyń teń jartysyna gazet-jýrnaldar satyp alady. «Egemen Qazaqstan», «Sport», «Jas Alash», «Qazaq ádebıeti», «Ana tili», «Parasat»... kileń qazaq basylymdary. Onsyz da «Shyqpa, janym shyqpa» dep tıyn sanap júrgen stýdentter onyń bir býma gazetti kóterip kele jatqanyn kórgende «Munyń ne, Serjan? Erteń de kún bar ǵoı. Azyqqa aqsha qaldyrsań qaıtedi» dep renjigendeı syńaı tanytady eken. Sekeń sonda da selt etpeıdi-aý! «Másele tek qaryn toıdyrý emes qoı. Adam balasyna rýhanı azyq ta qajet», dep jyly jymııady da qoıady. Osyndaı jaýapty estigende biz de tosylyp qalamyz. Sóz tapqanǵa qolqa joq!