Búgin Qoja Ahmet Iаsaýı kesenesinde atqarylǵan jumystarmen Qazaqstan Respýblıkasy Mádenıet jáne sport mınıstrligi Mádenıet jáne óner isteri departamentiniń dırektory Kúmis Seıitova BAQ ókilderimen ótken jıynda tanystyrdy, - dep habarlaıdy Egemen.kz.
Aýqymdy jumysty Mádenıet jáne sport mınıstrliginiń bastamasymen "Qazqaıtajańartý" RMK júrgizgen edi. Kúmbezdiń tarıhı kelbeti saqtalyp, jeldetkish qabattary retke keltirildi. Qazir kúmbez etegindegi segiz qyrmen qosylǵan jerinde gıdrooqshaýlaý jumystary jalǵasyp jatyr.
Kúmbezdi qaıta qalpyna keltirý jumystary barysynda ǵylymı-zertteý jumystary júrgizilip, oǵan belgili tarıhshylar, zertteýshiler jáne bilikti restavratorlar qatysqan.
Elimiz ǵana emes túbi bir túrki jurtynyń rýhanı ortalyǵy - Túrkistan qalasyndaǵy tarıhı-mádenı oryndardy qaıta jańǵyrtý, zertteý jáne týrıstik ortalyqqa aınaldyrý maqsatynda QR Mádenıet jáne sport mınıstrliginiń úsh jylǵa arnalǵan damý jospary bekitilip, júzege asyrylyp jatqany belgili.
Osy oraıda Mádenıet jáne sport mınıstrligine qarasty "Áziret Sultan" memlekettik tarıhı-mádenı qoryq-mýzeıi aýmaǵyndaǵy tarıhı oryndarda qaıta qalpyna keltirý jumystary, ortaǵasyrlyq Kúltóbe qalashyǵy, Han ordasy men meshiti ornalasqan magıstraldy kóshe boıynda arheologııalyq qazba jumystary qarqyndy júrip jatyr.
Sonymen qatar Qylýet jerasty meshiti (XII ǵasyr), Juma meshiti (XII-XIX ǵ.), Rabııa Sultan Begim kesenesi (XVI ǵasyr), Shıldehan (XIV-XV ǵǵ.), Shyǵys monshasy (XVI) taǵy basqa oryndarda aýqymdy sharalar qolǵa alynǵan.
Al ortaǵasyrlyq Kúltóbe qalashyǵy jáne Jeti ata negizgi kóshelerindegi arheologııalyq-qalpyna keltirý jumystarynyń nátıjesinde Qoja Ahmet Iаssaý kesenesi men kóne Túrkistan qalasy tarıhı-mádenı kesheniniń aýmaǵynan elimizdegi eń úlken ashyq aspan astyndaǵy murajaı ashý júzege asyrylyp keledi. Atalǵan jumystardy "Áziret Sultan" memlekettik tarıhı-mádenı qoryq-mýzeıi, Qazaq ǵylymı zertteý ınstıtýty jáne "Qazqaıtajańartý" RMK júrgizip jatyr.