Memleketter basshylary birin-biri kúlli musylmannyń merekesi Qurban aıtpen quttyqtap, Qazaqstan men Túrkııanyń baýyrlas halyqtaryna baq-bereke tiledi. Bul týraly Aqordanyń baspasóz qyzmeti habarlady, - dep jazady Egemen.kz
Áńgimelesý barysynda Prezıdentter eki eldegi qazirgi epıdemıologııalyq ahýaldy talqylady. Qasym-Jomart Toqaev Ankaranyń COVID-19 pandemııasyna qarsy tıimdi is-qımyldaryn joǵary baǵalap, Rejep Taııp Erdoǵanǵa gýmanıtarlyq kómek kórsetkeni úshin rızashylyǵyn bildirdi. Taraptar koronavırýstyń saldaryn joıý jáne daǵdarystan keıingi qalpyna keltirý jumystarynda kúsh-jigerlerin odan ári jumyldyra berýge ýaǵdalasty.
Eki eldiń Prezıdentteri Qazaqstan men Túrkııa arasyndaǵy strategııalyq qatynastardyń qazirgi jaǵdaıy men damý perspektıvalaryn qarastyrdy. Ekijaqty saýda-sattyqtyń oń qarqynyn saqtaýdyń jáne birlesken ınvestısııalyq jobalardy, ásirese, densaýlyq saqtaý, "jańa ekonomıka" jáne aýyl sharýashylyǵy salalary boıynsha bastamalardy júzege asyrýdyń mańyzdy ekeni atap ótildi.
Áńgimelesý sońynda Qasym-Jomart Toqaev Rejep Taııp Erdoǵandy Qazaqstanǵa resmı saparmen kelýge shaqyrǵanyn naqtylady.