Onyń qaıda ketkeni belgisiz. Ispanııa úkimetiniń basshysy Pedro Sanches karoldiń qaıda ekenin bilmeıdi. Bul týraly VVS habarlady.
Hýan Karlos dúısenbi kúni jemqorlyq faktisimen tergele bastaǵanyna baılanysty elden ketetinin málimdegen. Biraq qaı elge jáne qashan ketetinin aıtpaǵan. Búginde jergilikti buqaralyq aqparat quraldary karol týraly ártúrli aqparat taratýda.
2014 jyly otstavkaǵa ketken 82 jastaǵy burynǵy monarh, uly Fılıpp IV patshanyń bılik etýine kedergi keltirmes úshin Ispanııadan tys jerde turatynyn aıtyp júrgen.
Qazirdiń ózinde ıspandyq BAQ-ta «Hýan Karlos Ispanııadan ketip qaldy» degen habarlar paıda boldy. Sondaı-aq ol qazir Domınıkan Respýblıkasynda degen de derekter kezdesedi.
Al Domınıkan Respýblıkasynyń ımmıgrasııalyq qyzmetiniń resmı ókili burynǵy monarh shekaradan ótpedi dep málimdedi. Alaıda, ol bul memlekette aqpan aıynyń aıaǵynan naýryz aıynyń basyna deıin birneshe kún bolǵan.
Hýan Karlostyń ıspandyq kompanııalardyń Mekkeden Medınaǵa deıin temirjol salý úshin júrgizgen kelisim-sharttarǵa qanshalyqty qatysy bary tekserilip jatyr. Oǵan kelisim-sharttar jasalmaı turyp, úsh jyl buryn Saýd Arabııasynyń korolinen 100 mıllıon dollar kóleminde syılyq aldy degen de aıyp taǵylǵan. Biraq eks-karol aıyptaýlarǵa qatysty túsinikteme bermegen. Sondyqtan da bolar ol týraly aqparattar san-saqqa ketip jatyr. Ispandyqtar úshin ázirge onyń qaıda júrgeni qyzyq sekildi.